Máilmmi dovddus Johkamohkemárkanat leat lágiduvvon 461 jagi maŋŋálaga. Muhto korona dávda bisseha 2021:si Johkamohkemárkaniid, dieđiha Johkamohki gielda.
Johkamohki gielda lea mearridan liigečoahkkimis gaskavahku ahte Johkamohkemárkanat eai lágiduvvo boahtte jagi, 2021:s, fysalaččat nu go dábalaččat, ja sivva dasa lea koronadávda.
– Ii mana lágidit márkaniid go eai oaččo čoahkkanit eanet go 50 olbmo ovtta báikái. Lea veadjemeahttun juohkit márkana unnit osiide, dieđiha Johkamohki gielddahoavda Monika Lundkvist SVT Nyheterii.
Mearrádus lea váldon ovttas gielddain, báikkálaš entreprenevrraiguin ja Regiovnna njoammuneastadandoaktáriin.
Muhto Johkamohki gielda galgá digitála hámis lágidit márkaniid oktavuođas kulturdoaluid, iešguđetlágan čoahkkimiid ja gávppašeami, dieđiha SVT.
