Máze Sámiid Searvi ii leat doaimmas, nu lohká dálá jođiheaddji.
Máze Sámiid Searvi ii leat doaimmas, nu lohká dálá jođiheaddji.
Vahkkoloahpas čálii Ávvir Norgga Sámiid Riikkasearvvi 44. riikačoahkkima birra, gos okta dain stuorimus báikkálaš servviin NSR vuogádagas lea oalát nohkan, ii ge leat dál eambbo okta áirras bovdejuvvon.
Jus geahččá dan ektui go Máze Sámiid Searvi lea oktii leamaš dat stuorimus áirrasjoavku riikačoahkkimis, de lea juoga dáhpáhuvvan dainna servviin.
Ii doaimmas
Sotnabeaivvi lei Máze áirras, Klemet Erland Hætta, sajis.
Son duođašta Ávvirii ahte juoga lea nu movt ii galgga Máze Sámiid Searvvis ja lohká rievtti mielde dat ii leat doaimmas leamaš moatti jahkái.
Go maŋemus jahkečoahkkimis válljejuvvui ođđa stivra, de lei dat dainna eavttuin ahte boares stivra galggai loahpahit iežaset bargguid.
Jođiheaddji
– Dađi bahábut ii leat dat dahkkon. Dasa leat dieđusge olmmošlaš bealit manin ii leat dahkkon, muhto daid in áiggo dás váldit ovdan, lohká Klemet Erland Hætta.
Hætta lea gii dalle válljejuvvui stivrra jođihit, ja son doaibmá dál stivrajođiheaddjin, vaikke eai leat barggut boares stivrra bealis loahpahuvvon.
