Norgga Sámiid Riikasearvvi riikačoahkkimis Álttás lea čoahkkinlatnja spaggadievvá, earret Máze Sámi Searvvi beavdi, dat lea áibbas guoros.
Norgga Sámiid Riikasearvvi riikačoahkkimis Álttás lea čoahkkinlatnja spaggadievvá, earret Máze Sámi Searvvi beavdi, dat lea áibbas guoros.
Bearjadaga rahppui Norgga Sámiid Riikasearvvi (NSR) 44. riikačoahkkin Álttás.
Čuohtenáre oasseváldi leat boahtán miehtá Norgga, ja devdet čoahkkinlanja spagga dievva.
Dušše okta beavdi lea áibbas guoros, ja dat lea searvvi beavdi gos ovddeš áigge lávejedje buot eanemus áirasat ja mielaláhttut, nammalassi Máze Sámiid Searvvi beavdi.
Guoros beavdi
Máze Sámiid Searvvis (Máze SS) lea dál dušše okta áirras riikačoahkkimis, ii vel son ge leat boahtán.
Áirras logu oažžu riikačoahkkimii miellahttulogu vuođul, ja dat čájeha man unnán mielaláhttut Mázes lea dál NSR:s.
Go vel Bergen Sámiid Searvvis ge leat guokte áirasa riikačoahkkimis.
Govven: Nils Johan Vars
Nohkkán
Ovddeš Máze SS miellahttu ja riikačoahkkináirras, Berit Anne Gaup, lohká Mázes iežas oaidnit ahte oalát nohkkán dat mii lávii.
– Mun lean gullán ahte Mázes galggašii okta áirras, muhto ii dat ge vel oidno. Mii láviimet leat okta dain stuorimus sámi servviin NSR birrásis, muhto dál leat visot nohkkán, lohká Gaup.
Váivi
Gaup lohká Mázes hui bures doaibman dalle dat searvi, go son ásai doppe.
– Dál orro hui váivi munnje go in oainne Mázes ovttage, lohká son.
– Soaitá leat ahte mun lean čadnon Mázii, ja go dalle doaimmai nu bures dat searvi. Mázes lea measta nohkkán NSR vuoigŋa, muhto sávan ahte ii leat vel oalát nohkkán, lohká son.
Eai beasa váikkuhit
Berit Anne Gaup lea dál áirras Álttá Sámiid Searvvi ovddas riikačoahkkimis, mii dál ges lea rievdan ja šaddan okta dain stuorimus servviin.
– Lea hui suddu go dat sáhttá daguhit ahte eai beasa leat mielde váikkuheame go mearrádusat dahkkojit riikačoahkkimis . Oainnán Guovdageainnu beavdi lea maid guoros, lohká Gaup loahpas.
Govven: Nils Johan Vars
Eará doaimmain
Guovdageainnu Sámi Searvvi jođiheaddji, Ville Søderbaum, muitala ahte ii leat heiven buohkaide boahtit riikačoahkkimii, muhto eambbogat sávvamis jovdet lávvordat rájes.
– Mis leat maid nuoraidláhttut guđet leat dál juste NSR nuoraidprográmma čuovvume, nu ahte ii galgga leat áibbas guoros Guovdageainnu beavdi, lohká son.
Máze Sámiid Searvvi áirras lea Klemet Erland Hætta. Ávvir ii leat lihkostuvvan oažžut su vel ságaide. Ávvir čuovvola ášši.
Riikačoahkkin bistá gitta sotnabeaivái Álttás.
