Ollu bargoaddit vásihit doaibmamávssuid ja addosiid gustovaš vearronjuolggadusaid eahpečielggasin ja boaresáigásažžan. Ráđđehus evttoha dál rievdadusaid čielggasmahttin dihte dehálaš osiid lágas.
Ollu bargoaddit vásihit doaibmamávssuid ja addosiid gustovaš vearronjuolggadusaid eahpečielggasin ja boaresáigásažžan. Ráđđehus evttoha dál rievdadusaid čielggasmahttin dihte dehálaš osiid lágas.
Dat mielddisbuktá ahte šaddá álkibun meannudit áššiid rivttes láhkái.
– Doaibmamávssuid ja doaibmaaddosiid guoskevaš njuolggadusaid lea leamaš juo guhkit áiggi dárbu buoridit. Ráđđehusa evttohus mearkkaša ahte eahpesihkarvuohta, man ealáhuseallin lea vásihan eahpečielga njuolggadusaid dihte, dál jávká. Mii jávkadat maid boaresáigásaš ja moalkás sierranjuolggadusaid. Ealáhuseallimii šaddá geahppaseabbon meannudit áššiid riekta ođđa njuolggadusaid vuođul, cealká ruhtadanministtar Siv Jensen (OvB) ráđđehusa neahttasiiddus.
Bargoaddi ovddasvástádus
Ealáhuseallin ja vearroeiseválddit leat ovttaoaivilis ahte lea dárbu čielgasit njuolggadusaide maid lea vejolaš čađahit. Siviilaáittardeaddji lea maid ávžžuhan láhkaaddiid čielggadit gean ovddasvástádus lea raporteret, geassit ovdagessosa ja vástidit bargoaddidivada go bargi vuostái váldá doaibmamávssuid/addosiid earáin go bargoaddis.
Vearrodirektoráhtta lea sádden rievdadusaid gulaskuddamii, ja ráđđehusa evttohus čuovvu eanaš muddui sin cealkámušaid, muhtun heivehallamiiguin.
Váldoášši lea čielggasmahttit ahte lea bargoaddi geatnegasvuohta raporteret ja nu ain, maiddái go doaibmamávssut/addosat bohtet goalmmát bealis, ja bidjat supmerájá vuhtii válddedettiin vearutkeahtes bargiidvuoládusa eavttuid. Mii áigut maid ođasmahttit ja álkidahttit njuolggadusaid mat gusket earret eará aviissaide ja borramuššii badjeláiggebarggu olis.
Addet bargoaddiide áiggi
Evttohusa ulbmil lea álkidahttit ja čielggasmahttit njuolggadusaid, nu ahte dat buorebut sohpet dálá servodahkii ja doibmet govttolaččat. Bargoaddiin fertejit leat bargorutiinnat ja nu sajis vai sáhttet vearrogeatnegasvuođaid ollašuhttit, mat leat hui dárbbašlaččat eastadan dihte korrupšuvnna ja eará unohis váikkuhemiid goalmmát bealis. Rievdadusat láhčet dili buoret ollašuhttimii. Ráđđehusa áigumuš lea ahte rievdadusat oppalohkái eai galgga váikkuhit ollislaš vearroboađuide.
Ráđđehus lea mearridan ahte rievdadusat eai galgga gustogoahtit ovdal go sisaboahtojagi 2019, dan sivas go háliidit addit bargoaddiide áiggi geahčadit njuolggadusaid, rutiinnaid ja vuogádagaid mat gusket doaibmamávssuide/addosiidda bargodili olis. Ráđđehus áigu 2109 stáhtabušeahtas mearridit supmerájá vearutkeahtes bargiidvuoládusaide, čállá ráđđehus neahttasiiddus.
