Norrbottena politiijat dieđihit ahte lea gávdnon 60-jahkašas dievdoolmmoš jápmán čázis Viktoria-toarggas Haparandas duorastaga. Politiijat navdet ahte almmái lea goddon ja danin leat politiijat guorahallagoahtán ášši goddináššin.
Almmái lea identifiserejuvvon 60-jahkášas dievdoolmmožin gii gullá Ruŧŧii. Rumaš lea sáddejuvvon rumašiskosii gos čielggadit mot son jámii. Oapmahaččat leat dieđihuvvon.
Politiijat leat dahkan teknihkalaš guorahallama báikkis ja leat maid gažadan olbmuid. Sii vurdet dál rumašiskosa ovdal go sáhttet duođaštit lea go almmái goddon.
