Sámi Duodji čállá preassadieđáhusas ahte geigejit dán jagáš Guoradallam-stipeandda Inga-Wiktoria Påvii.
Sii čállet ahte Sámi Duoji 30-jagi ávvudeami oktavuođas leat geigen stipeandda. Ákkastallamis čilgejuvvo ahte stipeanda lea geigejuvvon duojárii guhte áigu čiekŋudit sierra suorgái ja ovddidit iežas duodjegelbbolašvuođa.
– Lean ilus ja giitevaš go vuostái válddán dán stipeandda. Dát buktá ihána buori vejolašvuođa suokkardit dasa mas beroštan nu sakka, lohká Inga-Wiktoria Påve.
Stipeanda lea 15 000 ruvdnosaš submi, ja mihttu lea movttiidahttit sámi duojáriid studeret ja čiekŋudit duodjesurggiide.
Ovttajienalaš mearrádus
Sámi Duodji jođiheaddji Linda Wågström Sevä muitala ahte leat boahtán olu buorit ohcamušat stipendii, ja ahte lei váttis juolludit dušše ovtta stipeandda.
– Lei ovttajienalaš stivra mii mearridii geiget stipeandda Inga-Wiktoria Påvii. Sus lei bures hábmejuvvon ohcamuš, mas čilgii ahte áigu guorahallat árbevirolaš davvi náhkkeveaskkuid. Sus lei čielga bargoproseassa sihke dán bargui, ja movt boahtteáiggis gáhtte ja fievrrida árbedieđuid.
