Sámedikki presideanta Aili Keskitalo lohká iežas vehá hirpmahuvván, ii ge lean vuordán ahte Bargiidbellodat áigu cegget eahpeluohttámuša sámediggeráđđái.
Ášši lea ođastuvvon
– Mun in riekta ipmir mii dat lea mii dáhpáhuvvá. Mii leat čađat leamaš gergosat šiehtadallat earáiguin, muhto lea váttis leamaš šiehtadallat dán háve go dat unnit joavkkut sámedikkis eai leat čájehan midjiide árvalusaid bušehttii, muitala Aili Keskitalo Ávvirii.
Bargiidbellodat lea dieđihan media bokte ahte áigot cegget eahpeluohttámuša sámediggeráđđái, ja áigot buktit sierra bušeahttaevttohusa dievasčoahkkimii dán vahkku.
NRK dieđuid mielde galgá Bargiidbellodat leat duhtameahttumat NSR sámedikkeráđiin, go oaivvildit ráđi unnán ohcalan ovttasbarggu eará bellodagaiguin boahtte jagi sámedikkebušeahta hápmema oktavuođas.
Sámedikki presideanta Aili Keskitalo ii lean vuordán dán dillái geavvat.
– Eai leat buktán árvalusaid bušehttii
Bargiidbellodat lea ráhkadan sierra bušeahttaárvalusa masa leat dál oččodeamen Sámedikki eanetlogu doarjaga, ja nu áigot maiddái ovddidit eahpeluohttámuša dálá sámedikkeráđi vuostá.
– Sámediggeráđđi lea ovdal šiehtadallan bušeahta bargiidbellodagain, muhto dál in sáhte spekuleret duogáža man dihte dát dáhpáhuvvá, dadjá Keskitalo.
Vibeke Larsen ii leat vel váldán oktavuođa sámedikki presideanttain, ja presideanta lea dušše media bokte ožžon dieđu mii dál lea dáhpáhuvváme.
NSR jođiheaddji maid hirpmahuvván
Norgga Sámiid Riikkasearvvi jođiheaddji Beaska Niillas lea maid hirpmahuvván dilis.
– Jus spekuleret galgá, de orro bargiidbellodat ráhkkaneame válggaide ja luoitiime suittehiid, lohká Beaska Niillas.
Dál imaštallo leat go eará áššit duogážis mat dagahit dili.
– Sáhttá maid spekuleret dán dili, go mannan vahkku lei LO muitaleame ahte sápmelaččat galget dohkkehit sisabahkkemiid. Ja dat lea mii orro oassi das mii dál dáhpáhuvvá, lohká NSR jođiheaddji.
Ságat (fertet máksit jus áiggot lohkat), čállá maid ahte dál orro eanetlohku doarjumin Bargiidbellodaga (Bb) bušeahttaárvalusa, mas 25 miljovnna ruvnnu leat vuoruhuvvon earáládje go NSR bušeahttaárvalusas.
Bb bušeahttaárvalus sáhttá earret eará dagahit ahte Sámedikki hálddahusas šaddet cealkit eret bargiid.
