– In leat summal vuolgán girkoválgii

Maŋŋel girkoválggaid de lea dál čielggas geat Guovdageainnus válljejuvvojedje ođđa searvegotteráđi guđa sadjái. Guovdageainnus ii lean go okta listu, mii lei nammadanlávdegotti listtu.  Ledje 684 olbmo geat jienastedje girkoválggas. Girkoverdde ja girkoválgga bargi Jan Ole Buljo muitala lea dušše okta dálá searvegotteráđis mii joatká.

 – Dat dieđusge ii leat dramatihkka das, go otná ráđis eai lean dat vihtta eará olbmo dáhtton joatkit ja eai lean nammaduvvon ge, lohká son.

Searvegotteráđđi 2015 -2019:

Risten Turi Aleksandersen, 37 jagi, seniorráđđeaddi, oaččui 873 jiena

Anne Berit Pulk, 20 jagi, studeantta, oaččui 853 jiena

Aslak Anders N. Siri, 61 jagi, girkodulka, oaččui 826 jiena

Mikkel Ailo Logje, 49 jagi, boazodoalli, oaččui 823 jiena

Ole Einar I. Hætta, 42 jagi, oahpaheaddji, oaččui 804 jiena

Sara Ellen J. Eira Heahttá, 41 jagi,ráđđeaddi, oaččui 790 jiena

Várrelahtut searvegotteráđđái:

May Grethe H. Gaup,43 jagi, Klemet Johansen Hætta, 68 jagi, Ellen Inga Brita O. Hætta, 62 år, Ellen Aina Eira, 41 jagi ja Johan Nils Peder Eira, 72 jagi.

Nuoramus searvegotteráđi miellahttu Anne Berit Pulk. Priváhta govva.

Seamma árvvut

Nuoramus searvegotteráđi miellahttu Anne Berit Pulk, gii lei vuosttaš geardde mielde girkoválggas, lohká somán gullat go nu ollugat ledje su jienastan.

 – Mun lean oalle konservatiiva ja jáhkán muhthnat leat jienastan dan vuođul go NRK Sámis lohken ahte lean vuostá sihke homofiillaid náitit girkus, nissonbáhpaid ja juoigama girkus. Mun oainnat jáhkán ollugat Guovdageainnus leat bajásšaddan daiguin konservatiiva árvvuiguin girku ektui, lohká son.

Girku ii amas

Vaikko Pulk lea nuorra, de ii leat girku amas sutnje.

– In leat summal vuolgán girkoválgii, go munnje gal lea girku hui oahpis. Lean máŋga jagi bargan konfirmašuvdnaoahpahusas veahkkin, ja lean maid aktiivvalaš sotnabeaivviskuvlla lágidemiin. Láven maiddái eaktodáhtolaččat girkus bargat, nu go ipmilbálvalusas teavsttaid lohkat, muitala Pulk.