Sotnabeaivve lea buot bassi olbmuid beaivi, beaivi goas muittaša sin geat leat vádjolan.
– Dán vahkkoloahpa mii muittašit sin geat leat vádjolan, muitala girkoráđđejođiheaddji Kristin Gunleiksrud Raaum preassadieđáhusas.
Girku lea báiki gosa olmmoš beassá boahtit visot iežas dovdduiguin, buot seavdnjadeamos morrašin gitta stuorámus iluin. Dán vahkkoloahpa leat doalut iešguđet girkuiguin, ja lea sadji moraštit, váillahit, čaibmat ja suhttat.
Norgga girku čalmmustahttá buot bassi olbmuid beaivvi miehtá riikka. Leat iešguđet doaimmat ja muitočalmmusteamit mii čohkke olbmuid. Iešguđet doaimmat sáhttet leat ipmilbálvalus, konsearttat ja rabas girku gos beassá ságastallat ja cahkkehit gintaliid.
– Buot bassi olbmuid beaivvi mii čoahkkanit, muittašit vádjolanolbmuid giitevašvuođain ja moraštit sin geaid leat massán. Mii maid rohkadallat fámuid buohkaide, loahpaha Raaum.
Guovdageainnu girkus lea buot bassi olbmuid beaivvi ipmilbálvalus skábmamánu 6. beaivvi. Máze girkus lea buot bassi olbmuid beaivvi ipmilbálvalus skápmamánu 14. beaivvi. Porsáŋggus lea buot bassi olbmuid beaivvi ipmilbálvalusat Bissojogas ja Billávuonas skábmamánu 5. beaivvi, ja Leavnnjas ja Čuđegiettis skábmamánu 6. beaivvi.
