Nils Johan Vars joatká Sámi Musihkkafestivála buvttadeaddjin, ja dan oktavuođas geažuha ahte Isac Elliot soaitá fas boahtemin Guovdageidnui.
Nils Johan Vars joatká Sámi Musihkkafestivála buvttadeaddjin, ja dan oktavuođas geažuha ahte Isac Elliot soaitá fas boahtemin Guovdageidnui.
Nils Johan Vars joatká Sámi Musihkkafestivála (SMF) buvttadeaddjin, dan dieđihii festivála stivrrajođiheaddji Ellen J. Sara Eira ikte eahkes.
– Stivra lei hui duhtavaš Nils Johan Vars buvttadeaddjebargguin diibmá ja lea giitevaš go son joatká SMF buvttadeaddjin, čállá Sara Eira.
Vars doaimmai mannan beassážiid maid SMF buvttadeaddjin, ja dál joatká olles virggis buvttadeaddjin gitta geassemánnui.
– Dát lea dakkár hui gelddolaš bargu, mas beasan bargat maid háliida. Barggan dárbbu mielde, ja nu leage muhtimin hui olu bargu, čilge Vars.
Rámiduvvon
Diimmá Beassášfestivála maŋŋil oaččui Vars olu rámi, sihke sosiála mediain ja earáin.
– Lea hui somá vuohttit ahte lean lihkostuvvan. Oidnen gussiid dáfus ahte manná bures, eat leat goassege vuovdán ná olu bileahtaid ovdal, čilge son ja lasiha:
– Muhto nuoraidkonsearta gos Isac Elliot čuojahii diehttelasat veahkehii bileahttaloguid dáfus. Oinniimet ahte ekonomalaččat manai bures ja go dan dáhká de leat lihkostuvvan, lohká son.
Ellioteriidda illusáhka?
Beakkán nuorra násti Isac Elliot, lei ge okta dain artisttain mii geasuhii eanemus gehččiid Báktehárjái beassážiid áigge. Danne jearrala ge Ávvir ahte lea go jurddašan olahit vel buoret bohtosiid dán jagi.
– Ulbmil lea ovdánit diimmážis. Dalle lei dieđusge Sámediggi mielde danne lei vejolaš Isac Elliota bovdet, muhto dán jagi gal soaitá maid vejolaš dan dahkat. Jáhkán ahte nuorat girdet Isac Elliota gullat vel nuppes, lohká Vars.
– Don orut geažuheamin ahte Elliot boahtá fas?
– Na in ainjuo biehttal ahte boahtá, muhto lea olu mii galgá doaibmat ovdal go nie stuorra násti sáhttá boahtit. Gáibida olu barggu.
Mo dal de leaš, boađáš go Isac Elliot vai ii, de Vars goittot ge lohpida ahte maiddái boahtte beassážiid nuoraidkonsearta galgá stuorra dáhpáhussan.
– Nuorat leat birra jagi čállán ja cavgilan makkárin háliidit nuoraideahkeda, dat lea buorre ja dan ožžot áinnas joatkit ain dahkat, loahpaha Nils Johan Vars.
