“Muohtadivggažat” lea namma čájálmasas mii galgá muitalit nuortalaččaid váttis historjjá birra. Sámediggeráđđi lea hui rámis go dorjot juste dán prošeavtta.
Norgga sámediggeráđđi juolluda 150 000 ruvnno vuođđudussii Ferske Scener, teáhterčájálmasa Muohtadivggažat/Lyden av snø buvttadeapmái. Čájálmasa fáddán lea nuortalaččaid kultuvra ja historjá deaivvadettiin oarjemáilmmiin ja Ruoššain. Nu čállá Sámediggi preassadieđáhusas.
Rájákeahtes álbmoga váttisvuođat
1826 – 1949 áigodagas rievdaduvvojedje máŋgii rájit Norgga, Suoma ja Ruošša gaskka, ja nuortalaččaid árbevirolaš eallinvuohki šattai váttisin. Dan beali sámi historjjás lohká sámediggeráđđi Henrik Olsen dehálažžan oažžut ovdan.
– Sámediggeráđđi lea ilus go sáhttá leat veahkkin duohtandahkamin teáhterbuvttadeami mii čalmmustahttá nuortalaččaid váttis historjjá rájakeahtes álbmogin, masa stuorraválddiid rádjarievdadeamit garrasit čuhce, dadjá Henrik Olsen.
Dramáhtalaš historjá
Čájálmas ovdanbuktá golbma vuolggasaji, main juohkehaš govvida eallima rádjariikkain nuortan ja oarjin, ja olbmuid mat doppe ásse. Dán guovllus dáhpáhuvve eanemus dramáhtalaš soahtedagut, ja lea guovlu gos stuorraválddit Ruošša ja USA leat maŋimus 100 jagis geavahan ollu militeara resurssaid nannet ráji.
Bihttá čájehuvvo vuosttaš geardde 2020 geassemánus Festspillene i Nord-Norge riemuin. Dasto čájálmas vuolgá turnéii, čállá Sámediggi.
