Davvi Dearvvašvuođa stivra lea mearridan huksegoahtit Sámi dearvvašvuođasiidda 2017:s. Kárášjoga sátnejođiheaddji lea ilus dainna.
Davvi Dearvvašvuođa stivra lea mearridan huksegoahtit Sámi dearvvašvuođasiidda 2017:s. Kárášjoga sátnejođiheaddji lea ilus dainna.
– Dát lea ádjánan veahá ja leimmet measta duššástuvvamin go orui guhká ádjáneamen. Dat dattege lea historjá dál ja mii illudat boahtteáigái, lohká Kárášjoga sátnejođiheaddji Svein Atle Somby.
Davvi Dearvvašvuohta lea ievttá stivrračoahkkimis mearridan ráhkadišgoahtit huksen plána Sámi dearvvašvuođasiidda olis. Huksenbarggut álget 2017:s, čállá NRK Sápmi.
– Boahtá buorrin olles Sápmái
Sátnejođiheaddjin lohká dán ođđa fálaldaga, mii ásahuvvo Kárášjohkii, boahtit buorrin olles sámeservodahkii.
– Dát boahtá buorrin olles sámi servodahkii go čohkkejit gealbbu ovtta sadjái ja sáhttet fállat dan sápmelaččaide miehtá riikka, muhto maiddái ruoŧa- ja suomabeale sápmelaččaide, lohká Somby ja lohká iežas leat ilolaš sátnejođiheaddjin odne.
(Ášši joatká gova vuolábealde)
Álget hábmet
– Mii leat dál mearridan álggahit idéoasi, dat mearkkaša dan oasi barggus mas plánegoahtit Sámi dearvvašvuođasiidda ja dan sisdoalu, muitala Davvi Dearvvašvuođa direktevra Lars Vorland NRK:i.
Dearvvašvuođadoaimmahat lea jo juolludan birrasiid 50 miljovnna dearvvašvuođasiidda huksemiidda.
– Ja de leat iešguđet oasit maid fertet čađahit. Vuosttaš oasi gohčodat idé- ja konseaptaoassin. Dat mearkkaša ahte galgat gávnnahit maid visti galgá sisttisdoallat ja man stuorisin galgá šaddat. Ja de álggahat ovdaprošeavtta, vai sáhttit huksegoahtit boahtte jagi, nammalassii 2017:s, čilge Vorland.
Visti galgá gárvánit 2018:s.