Rørosrein fitnodat oažžu 500 000 ruvnno doarjaga Sámedikkis.
Sámediggeráđđi lea mearridan juolludit 500 000 ruvnno Rørosrein AS:i, mii lea álggaheamen stuorát ovdánahttinprošeavtta.
– Mii leat hui ilolaččat go oaččuimet doarjaga. Mii áigut nuppástuhttit iežamet, ja áigut ođasmahttit rusttegiid ja boradanbáikki. Eat áiggo stuoridit, muhto ođasmahttit, mas lea leamašan sáhka guhká, muhto dál lei áigi álgit, lohká Rørosrein fitnodateaiggát ja beaivválaš jođiheaddji Eva Nordfjell.
Illudahtti doarjut
Rørosrein buvttada báikkálaš bohccobierggu, lassin dasa lea sis vel boradanbáiki guovddáš Plassjes gos guossohit báikkálaš sámi árbevirolaš borramuša.
– Lea illudahtti doarjut fitnodaga mii geavaha báikkálaš sámi árbevieruid guovllu bohccobierggu reidemii ja árvoháhkamii, lohká Sámedikki ráđđelahttu Silje Karine Muotka preassadieđáhusastis.
Sávvá eambbo prošeavttaid ilbmat
Rørosrein lea dál investeremin ollu, sii áigot earret eará investeret rusttegiid vai lasihit buvttadeami. Seammás áigot ođasmahttit boradanbáikki nu ahte šaddá vel buorebun.
– Mis lea vejolašvuohta doarjut prošeavttaid mat definerejuvvojit liigeealáhussan boazoealáhussii dahje sámi mátkeealáhussii. Mii sávvat eambbo prošeavttaid dain surggiin, dadjá Muotka.
