Odne lea illubeaivi Anáris, Suomas, go Deanu kulturskuvla boahtá Suoma beallái sámi mánáid ja nuoraid guossái iežaset čájalmasain «Charlie ja sjokoladefabrihkka».
Teáhterbeaivi lea Deanu kulturskuvlla ja Sámi mánáid kulturguovddaš MÁNNU ovttasbargu, mii lea addán buori bohtosiid.
Sámi nuorat Anáris ozzot teáhtervásáhusa oktii jagis Anáris.
– Deanu kulturskuvlla oahppit besset neaktit Sajos kulturguovddáža lávddis ja Suoma beale nuorat fas návddašit sámegielat kulturdoaluin, teáhtera hámis, dieđiha Petra B. Magga-Vars preassadieđáhusas, gii lea Sámi mánáidkulturguovddáža MÁNNU doaibmajođiheaddji.
Mánáidkulturguovddáš máksá sámi ohppiide sáhtu Anárii ja bovde maiddái giellabesiid ja sámi beaiveruovttuid geahččat dan čájalmasa.
Anárii leat ovdalgihtii almmuhan 80 geahčči, ja stuorámus oassi dain leat mánáidskuvlla oahppit.
