Dovddus sámi artisttat, musihkka, luohti, sierra lávdi taleanttaide ja njoarostangilvu leat oassin Ijahis festivála ija viiddis prográmmas.
Čakčageasi, borgemánu 19. ja 20. beaivvi lea Anár báiki gos olu dáhpáhuvvá. Doppe leat fálaldagat sihke unnibuidda ja stuorábuidda.
– Dáhpáhus álgá bearjadaga 19.8. mánáid- ja nuoraidprográmmain. Beaivvi áigge ovddalgihtii almmuhan mánát ja nuorat oassálastet bargobájiide ja besset geahččat sámi filmmaid. Sii besset maiddái čájehit iežaset dáidduid Násttážat-konsearttas.
Fanasmátki ja konsearta
Ijahis Idja -festivála rahppojuvvo bearjadaga dii 18.00, muhto jo ovdal dan, lea vejolaš vuolgit Ijahis ija fanasmátkái Anárjávrái ja vásihit Ailu Valle konseartta. Dasto leat doalut gitta idjii.
– Bearjadaga konsearttaid Ijahis ija festiválaguovllus álggaha aiddo ođđa cd-skearru almmuhan Emil Kárlsen. Čuovvovažžan lea vuorus okta dálá bivnnuheamos sámeartisttaidartisttain, ISÁK. Bearjadaga konsearttat nohket sihkkarit garra leavttuin go lávdái njuikejit Bernt Mikkel Haglund ja juoigit, čállet lágideaddjit preassadieđáhusas.
Taleantalávdi ja garra trio
Lávvardaga galget sii geat eai leat nu olu vuos leamašan lávddiid alde lávket lávdde ala.
– Vuosttas konsearta lea Taleantalávdi, mas lávddi ala besset artisttat, geat eai vel leat leamašan olu oidnosis, muitalit lágideaddjit.
– Lávvordaga lea maid vejolaš vásihit Evvan nõmmpeeiʼv (Evvan namabeaivvit), mii lea aivve ođđa nuortalaš musihkkáriid joavku. Árbevirolaš sámemusihka Ijahis ija lávdái buktet fas Ulla Pirttijärvi-Länsman, Semmen Bolshunov ja Petter Morottaja. Lávvardaga konsearttat nohket garra trioin, go lávdái bohtet maŋŋálagaid Arvvas, Angelit ja Intrigue.
Njoarostangilvu
Ijahis Idja -festiválas beasat maiddái geahččaladdat suohpangieđat.
– Konsearttaid olis festiválaguossit besset njoarostit. Dárkilvuođa gáibideaddji gilvu lágiduvvo Sajosa šiljus, muitalit lágideaddjit vel.
