– Ii oktage leat dieđihan iežas váillahit 40 heakka

Boazopolitiijaid vuosttašbálvá Torbjørn Berg ii loga politiijaid navdit dás leat sáhkan boazosuolavuođas.

– Ii leat oktage dieđihan politiijaide ahte váillaha birrasiid 40 heakka, ii mihkkege čujut dasa ahte leat suolabohccot, dadjá Berg.

Nuoskkideapmi

Boazopolitiijabálvá muitala Guovdageainnu suohkana dieđihan ahte ihttánaga čorgejit eret duljiid mat leat johkagáttis Mázes.

– Dát lea oainnat nuoskkideapmi, vaikke de leat orgánalaš (juorn. meark.: luondduávdnasat) mat leat bálkestuvvon lundui. Dáid livččii giđđadulvi dolvon ja dát livčče guohcagan johkii, čilge Berg.

– Bealljit galget čuovvut dulljiid

Duljiin leat bealjit čuhppon eret. 

– Bealjit galget čuovvut duljiid. Mun in sáhte kommenteret manne dat leat eret čuhppon, muhto diehttelasat leimmet de sáhttit identifiseret boazoeaiggáda jus duljiin livčče leamaš bealjit gitta, dadjá Berg.

Ii leat dábálaš

Berg ii loga leat dábálažžan ahte gávdnet duljiid ná.

– Dan áiggis go mun lean bargan, de eat leat vásihan dákkár nuoskkideami, muhto suohkana bealis gal lohket dán dáhpáhuvvat dávjá, muitala Berg.

Son ii loga diehtit makkár ráŋggáštusa sáhttá oažžut jus olmmoš gávnnahallá ná nuoskkideamen luonddu.

– Dan gal fertejit juristtat vástidit, muhto árvideames sáhkkohalašii ainjuo.

Gávdnon ikte

Oarje-Finnmárkku politiijat čállet ahte háliidit cavgilemiid go leat gávdnan birrasiid 40 duolji Máze davábealde. Politiijat eai dieđe geasa dát gullet ja manne bohccot leat leamaš njuvvon.

– Boazopolitiijat gávdne duljiid ikte davábealde Máze. Mii háliidat diehtit manne dat leat doppe ja leat go lobálaččat njuvvon, dadjá Oarje-Finnmárkku politiijaguovllu operašunjođiheaddji Geir Roar Nesbø.

Bealljit čuhppon eret

– Duljiin leat bealjit čuhppon eret, danne eat dieđe ge geasa dát gullet, čilge Nesbø ja muitala duljiid gávdnon birrasiid kilomehtera davábealde lagamus viesu Mázes.

– Mu dieđu mielde eai orron bohccot njuvvon doppe gos duoljit gávdnoje, dadjá Nesbø.

Politiijat dutket ášši.

Ávvir čuovvu ášši.