Son ii oaččo gokčojuvvot sáhtu fástadoaktára lusa Pasieantareaissu bokte, ja go dárbbaša sáhttu beassan dihtii mátkái, de ii áiggo vuollánit áššis.
Son ii oaččo gokčojuvvot sáhtu fástadoaktára lusa Pasieantareaissu bokte, ja go dárbbaša sáhttu beassan dihtii mátkái, de ii áiggo vuollánit áššis.
Mázelaččas Ellen Anne Hættas (75) livččii odne leamaš doavtterdiibmu su fástadoaktára luhtte. Hættas lea fástadoavttir Kárášjogas, ja dábálaččat láve son oažžut sáhtu dohko gokčojuvvot «Pasientreiser» divššohasmátkki bokte.
– Mun ožžon ikte eahkes dieđu Pasieantareaissus ahte sáhttu otná doavtterdiibmui Kárášjohkii ii gokčojuvvo, na ahte dán diimmu gal manahin, ja ferten várra maŋidit dan, lohká son.
Biddjui Kárášjohkii
Hætta čilge sus lea fástadoavttir leamaš birrasii vihtta jagi Kárášjogas.
– Dalle ledje ollu olgoriikka doaktárat geat barge Guovdageainnus, ja mun de ohcen fástadoavtterortnega mielde ja ožžon fástadoaktára Kárášjohkii, gos ožžon sámegielat doaktára. Go lea leamaš seamma doavttir guhkit áiggi, ii hal de leat miella molsut dan. Mun gal lean hui duhtavaš doaktáriin Kárášjogas, ja mun gal in áiggo molsugoahtit Guovdageidnui, lohká son.
Lagamus báikái
Pasieantareaissu ossodatjođiheaddji Bjørn Erik Johansen lohká sis leat njuolggadusat dainna lágiin ahte pasieanttain lea riekti oažžut gokčojuvvot sáhtu iežas suohkana siskkobealde.
– Jus pasieanttas lea fástadoavttir eará suohkanis, de gokčat daid goluid dan sáhtu livččii máksán doaktára lusa ruovttusuohkanis. Lassigolut, mat de vel gártet, daid ferte pasieanta ieš gokčat, lohká son.
Ávžžuha molsut
Johansen lohká okta vejolašvuohta oažžut gokčojuvvot pasieantamátkki nuppi suohkanii lea jus gávdno fástadoavtterovttasbargu guovtti suohkanis.
– Mu dieđuid mielde ii galgga dahkkon dakkár soahpamuš Guovdageainnu suohkana ja Kárášjoga gieldda gaskka. Na ahte mu ávžžuhus gal lea ahte sirdá fástadoaktára ruovttusuohkanii, vai oažžu gokčojuvvot mátkki Pasieantareaissu bokte, lohká Johansen.
Ii vuollán
Hætta oaivvilda ahte dat ii gula Pasieantareisui gos sus lea fástadoavttir, muhto son lea sorjavaš oažžut sáhtu go sus alddis ii lea biila.
Son ii duđa Pasieantareaissu ossodatjođiheaddji čilgehussii, iige áiggo vuollánit áššis.
– In dárbbaš lihkus nu dávjá doaktára lusa, muhto mu mielas gal galggašii oažžut sáhtu gokčojuvvot, go juo lea dalle vihtta jagi áigi biddjon munnje fástadoavttir nuppi suohkanis, lohká son ja áigu smiehttat movt dahká ovddasguvlui.
