Vaikko Signe Marie Fidje Store lei álggos kvalifiseren OG-gilvvuide moadde vahkku áigi, de ii leat válljejuvvon beassat OG-gilvvu oassálastin vuosttaš vuoruheamis.
Vaikko Signe Marie Fidje Store lei álggos kvalifiseren OG-gilvvuide moadde vahkku áigi, de ii leat válljejuvvon beassat OG-gilvvu oassálastin vuosttaš vuoruheamis.
Olympiatoppen lea mánnodaga válljen vuosttaš valáštalliid geat galget OG-gilvvuide ja Paralympicsii Rioi dán geasi. 16 valáštalli leat gergosat gilvvuide, muhto muhtimat, geat leat nagodan A-gáibádusa, eai beasa aŋkke vuolgit Rioi, čállá NRK.
Kvalifiserii, muhto ii leat vuoruhuvvon
Signe Marie Fidje Store (20) lea okta sis, gii kvalifiserii miessemánus.
– Lihttu lea dadjan ahte ágga manne mun in beasa vuolgit lea go eai leat sihkkarat ahte mu čippit leat dearvvašnuvvan, ja ahte fertejin daid iskat ovdal go dohkkehit mu viidáset, dadjá Fidje Store NRK:i.
Ii loga várálažžan
Son lea bávččagahttán lađđasa čippis, muhto lea ieš sihkar ahte ii leat várálaš searvat OG-gilvvuide.
– Lea vehá imaš. Dat lea dušše vietnan, ja in dieđe maid sii leat jurddašan. Mun han lean hárjehallanmátkkis Bulgarias dál ja hárjehalan nu go láven dábálaččat. Mun rehkenasttán ahte nuppi vuoruheamis beasan mielde, muđuid gal hirpmahuvan issorasat, muitala son NRK:i.
Buoret vejolašvuohta go buorrána
Heaibunsearvvi valáštallanhoavda Anders Hestdalen deattuha ahte sii ledje vuoruhan Fidje Store, muhto son ii leat dan dihte hirpmahuvvan go Olympiatoppen lea nie válljen.
– Sus lea ain vihkestáhtus, ii ge beasa viidáset OG-gilvvuide ovdal go čibbi lea áibbas buorránan. Son lea ožžon dan dieđu, ja dat ii leat gal nu imaš. Go čibbi buorrána fas, de lea stuora vejolašvuohta ahte son beassá oassálastit OG-gilvvuin, čilge son NRK:i.
