Norgga stáhtaministtar Erna Solberg ii áiggo skeŋket Hálddi várrečohkka Supmii. Son gii evttohusa buvttii, ii dohkket dan.
Norgga stáhtaministtar Erna Solberg ii áiggo skeŋket Hálddi várrečohkka Supmii. Son gii evttohusa buvttii, ii dohkket dan.
– Dás eat dohkket «a-a» vástádussan. Mun lean áibbas sihkar ahte sii geat leat rávvagiid buktán stáhtaministarii, eai leat áibbas riekta ipmirdan mii ášši rievtti mielde lea, muitala geologa Geirr Harsson NRK:i.
Ii áiggo skeŋket čohka
Suopma ávvuda 100 jagi sierra riikan boahtte jagi, ja dan oktavuođas lea Gáivuona ovdagoddi evttohan ahte Norga sáhttá addit Háldečohka skeaŋkan, ja sirdilit ráji 40 mehtera Norgga ja Suoma gaskkas.
Stáhtaministtar Erna Solberg lohká ahte ii sáva čađahit evttohuvvon rádjesirdima, vaikko leat buorit responssat leamaš.
– Rádjesirdimat riikkaid gaskkas dagahit váttis juridihkalaš hástalusaid, earret eará Norgga Vuođđolága ektui. Mii áigut baicce árvvoštallat eará heivvolaš skeaŋkka Suoma ávvudeapmái, čállá Solberg reivves Gáivuona suohkana sátnejođiheaddjái Svein O. Leirosii.
Sátnejođiheaddji beahtahallan
Dan botta go Harrson deattuha ahte lea dušše sáhka sirdit ráji ovtta goalmmádasoasi spábbačiekčanšilju ektui, ii ge sáhte ipmirdit ahte ášši galgá leat nu váttis.
Sátnejođiheaddji lohká iežas beahtahallan, muhto ii leat dattetge vuollánan.
Háldi lea Suoma alimus várri ja lea 1 324 mehtera allat, muhto Háldi várrečohkka, mii lea Norgga bealde ráji, lea 1 361 mehtera allat.
