Ellos Deanu dáiddárat vuođđudan dekolonialisttalaš iešstivrejumi bagadanbálvalusa.
Ellos Deanu dáiddárat vuođđudan dekolonialisttalaš iešstivrejumi bagadanbálvalusa.
Moratoriadoaimmahat, iešstivrejumi bagadanbálvalus rahpá uvssaidis ja fállagoahtá nu Sámis go dan olggobealde dekolonialisttalaš reaiddu kolonialisttalaš válddii jávkadeapmái.
Moratoriadoaimmahat veahkeha báikkálaš servošiid, joavkkuid, sogaid ja bearrašiid moratoriaid ásaheamis, iešstivrejumi fámuidahttimis ja guovlluset sámáidahttimis.
– Šearretsullo moratoria maŋŋá lea gullostan ahte olbmot áiggošedje moratoriaid ásahit. Moratoriadoaimmahagain mii háliidat čoavdit dien ášši. Mii fállat dekolonialisttalaš iešstivrenbagadusa ja veahkehit olbmuid ásahit moratoriaid, lohká dáiddár Mihku Ilmára Jenni, doaimmahaga bargi, preassadieđáhusas.
Juogadit dássáš moratoriabarggus čoggon máhtu
Diibmá bekkiige Čearretsullo moratoria, man Ellos Deatnu ásahii Deanu ođđa guolástusnjuolggadusaid hárrái. Moratoria oaivvilda dan ahte juoga, dego láhka, proseassa dahje doaibma bissehuvvo, ahte juoga nu ii gusto meroštallojuvvon moratoriaguovllus.
– Čearretsullos oahpaimet, ahte moratoria lea viehka beaktilis vuohki cakkadit koloniála válddi ja hálddašišgoahtit guovlluideamet. Moratoriadoaimmahat lea vuohki juogadit dássáš moratoriabarggus čoggon máhtu. Doaimmahaga ulbmil lea nannet guovlluideamet geavaheami sámi árvvuid mielde ja fállat veahki álbmogii eallit sápmelažžan luonddu dássedeattu buorrin, čilge Mihku Ilmára Jenni.
Moratoriadoaimmahat fállá gárvves moratoriagurppiid, maiguin olbmot sáhttet álkit ásahit moratoriaid ja sámáidahttit guovlluset. Gurpi sisttisdoallá rávvagiid ja veahkkereaidduid.
Dasa lassin doaimmahat johtá sihke Sámis ja máilmmis dán jagi, ja fállá bálvalusaidis maiddái olbmuid lahka.
Motoriadoaimmahat lea dáiddáriid Mihku Ilmára Jenni/Suohkanterror, Jalvvi Anna-Liissá Niillasa ja Čiskke Jovsset Biret Hánssa Outi searvvušdáiddalaš iešstivrejumi fidnu ovttasbarggus Ellos Deatnu -joavkkuin.
