Go gielddaválggat čađahuvvojit boahtte čavčča, de eai searvva 32 proseantta dálá sátnejođiheddjiin válggaide. Oassi manná ealáhahkii ja earát ges leat ohcagoahtán ođđa bargguid.
Kommunal Rapport lea ráhkadan oppalašgova mii čájeha ahte juohke goalmmát sátnejođiheaddji ii searvva čavčča gielddaválggaide.
Sin searvái gullá earret eará Bådådjo sátnejođiheaddji Ida Pinnerød (Bargiidbellodat). Son leamaš sátnejođiheaddjin guokte áigodaga ja lea gávpotráđis čohkkán 12 jagi. Sus lea plána máhccat iežas bargui Nord universitehtii maŋŋel go luohpá sátnejođiheaddjin.
– Mun jáhkán ahte lea buorre sihke munnje ja Bådåddjoi ahte molsot sátnejođiheaddji. Mu mielas orru vuogas ahte olbmot eai čohkká menddo guhká fápmoposišuvnnain. Bealistan lean dahkan árvvoštallamiid ja gávnnahan ahte dál lea áigi geassádit, lohká Bådådjo sátnejođiheaddji Ida Pinnerød Kommunal Rapportii.
Eará Davvi-Norgga stuorámus gávpogiin, Romssas, Hársttáin ja Álttás gal háliidivčče sátnejođiheaddjit joatkit. Sámi suohkaniin heitet Guovdageainns, Porsáŋggu, Dielddanuori ja Raarvihke dálá sátnejođiheaddjit.
