Finnmárkku buohcceviessu HF huksegoahtá Hámmárfeastta ođđa buohcceviesu.
Davvi Dearvvašvuohta dohkkehii mánnodaga dearvvašvuođafitnodaga doaibmabidjoplána. Hámmárfeastta ođđa buohcceviessu šaddá Oarje-Finnmárkku báikkálaš buohcceviessun, ja plána mielde galgá huksen álgit 2020 giđa. Dán dieđiha Finnmárkku buohcceviessu preassadieđáhusas.
Hámmárfeastta ođđa buohcceviessu lea Finnmárkku buohcceviesu, UIT- Norgga árktalaš universitehta ja Hámmárfeasta suohkana ovttasbargu.
Ođđa buohccevissui galget earenoamášdearvvašvuođabálvalusat, medisiidna- ja buohccedivššárskuvla, doavttervákta ja dearvvašvuođaviessu.
Finnmárkku buohcceviesu golahusrámma ođđa buohccevissui lea sullii 2.32 miljárdda ruvnno, go visti lea gárvvis 2024:s.