Helgelándda sámi artista almmuha vuosttaš «remiksa» Spotifyas odne – ja dat lea eaŋgalasgillii. – Duođai hástalan iežan dahkat juoidá ođđasa.
Mii dovdat su «DJ iDJa» namain, ja lea dađis šaddan dovddus namman sámi festiválain. Dál lea hástalan iežas dahkat juoidá ođđasa ja lea «remiksen» lávlaga eaŋgalasgillii.
Lávlaga namma lea «White Country (DJ iDJa Groovy Techno Mix)» ja almmuhuvvo bearjadaga borgemánu 4. beaivvi.
– Bargat earáid lávlagiin ja ráhkadit dan iežan, lea leamašan hástalus munnje. Ledje olu ijat go in oađđán ovdal go luovvanii, dadjá Markus Thonhaugen.
Originála lávlaga «White Country» lea dánskka joavku Sweet Tempest ráhkadan ja dat lea čuojahuvvon badjel 700 000 geardde Spotifyas.
– Sin PR-ageanta válddii oktavuođa muinna go liikui mu stiilii. In jáhkkán ahte bohten nagodit dan, muhto bánda lei hui duhtavaš «remiksain» maid lean ráhkadan. Lean hirpmahuvvan go nu liikojedje dasa.
Bánda PR-ageanta, Daniel Kinkartz, dadjá ná bánda ovddas:
– Dát komposišuvdna gal hui sihkkarit oažžu guldaleddjiid lihkadit, ja lea maid bistevaččat darvánan min millii.
