Deanočázádaga Guolástanhálddahus (DG) lea hilgon Dálkkádat- ja birasministara bovdehusa hábmet ođđa njuolggadusaid Deanočázádaga ođđa soahpamuššii, go DG ii hálit guoktiluššat.
Deanočázádaga Guolástanhálddahus (DG) lea hilgon Dálkkádat- ja birasministara bovdehusa hábmet ođđa njuolggadusaid Deanočázádaga ođđa soahpamuššii, go DG ii hálit guoktiluššat.
Dálkkádat- ja birasministtar (DBM) Vidar Helgesen lea bovden Deanočázádaga guolástanhálddahusa (DG) mielde álggahit heivehit Norgga ja Suoma árvaluvvon ođđa soahpamuša.
DG lea vástidan ahte sii leat dieđihan DBM ámmátolbmuide ahte eai hálit searvat dáid heivehallan ráhkkanemiide.
DG stivrajođiheaddji Steinar Pedersen čilge sii eai sáhte searvat njuolggadusaid hábmet dakkár šiehtadusa vuođul man ieža eai doarjjo.
– Sivva dasa lea go soahpamušárvalusas leat nu olu meannudanváilevašvuođat, earret eará ahte rihkku Deanulága ja ahte departemeantta meannudeapmi rihkku Norgga álbmotriektelaš geatnegasvuođaid iešguđet riikkaidgaskasaš soahpamušaid eamiálbmogiid guoskevaš áššiide, čállá Steinar Pedersen DBM:ii.
Ártet earáide jus searvvašii
Pedersen čállá viidáseappot ahte livčče imaš jus DG oasálasttášii bargui man ulbmil lea heivehit soahpamuša Deanočázádahkii.
Su mielas livčče maid ártet nu dahkat daid ásahusaid ektui, mat maid lea hilgon Norgga ja Suoma soahpamušárvalusa, erenoamážit go diehtá sii leat dáhtton ođđa šiehtadallamiid gos báikegottit ja vuoigatvuođalaččat guktui beal rájá maid leat mielde.
Pedersen čujuha ahte Norgga ja Suoma beale Sámedikkit, rádjagielddaid sátnejođiheaddjit, Finnmárkku fylkkamánni gean mielas ii leat riekta addit ođđa jovkui, suoma bartaeaiggádiidda ođđa vuoigatvuođaid, ja Finnmárkku Stuorradikke áirasat leat moaitán árvaluvvon soahpamuša.
Dohkkeheamis
– Dál lea soahpamuš geigejuvvon Stuorradiggái Norgii ja Suoma Riikabeaivái dohkkeheapmái. Eat mii sáhte searvat njuolggadusbargui maid mii eat doarjjo, joatká Steinar Pedersen.
Son lohká DG ulbmil lea olahit loahppabohtosa mas vuoigatvuođalaččat ja báikkálaš beroštumit leamaš mielde hábmemin ja ahte soahpamuš sihkkarastá luossanáli olles Deanočázádagas boahtte áigái.
– Eat hálit čatnat iežamet
– Mii vuordit ahte mii, DG:s, beassat searvat ollislaččat ja oažžut váikkuhanválddi dan barggus mii čuovvu maŋŋá go Stuorradiggi lea meannudan ášši. Mii vuordit maid ahte eai čana min oassálastima ovdal go Stuorradiggi lea dadjan maŋimuš sáni dán áššis, loahpaheaba DG stivrajođiheaddji Steinar Pedersen ja DG direktevra Hans-Erik Varsi.
