Kárášjohkalaš Kirsten Larsen dahje Mákká Kirste lohká iežas nu heahpanit, go Kárášjoga kirku riidduid geažil heittii báhppa ámmáhis.
Kárášjohkalaš Kirsten Larsen dahje Mákká Kirste lohká iežas nu heahpanit, go Kárášjoga kirku riidduid geažil heittii báhppa ámmáhis.
Das maŋŋá go Kárášjoga báhppa Franziska Förster gildojuvvui doallamis ipmilbálvalusa Láhpoluobbala kirkus, lea riidu lassánan.
Kárášjoga báhppa celkkii eret ja oaččui barggu nuppe sajis.
Bivdet bargoaddiid čoavdit dili
Golggotmánu 21. beaivvi lágiduvvui álbmotčoahkkin Kárášjoga kirkus ja čoahkkin lea sádden breava Kárášjoga gildii ja Sis-Finnmárkku proavvásii gos bivdet bargoaddiid čoavdit searvegottehálddahusa unohis bargodili.
– Mu mielas lea stuorra heahpat go riidalit kirkus. Lea vearrát go olgobáikkis juhkanolbmot. Kárášjoga báhppa Franziska Förster lea munnje hui buorre ustit. Son muitalii munnje son liikui Kárášjohkii. Sus ii lean miella vuolgit, muhto fertii ráfi dihtii vuolgit. Álbmotčoahkkimis lei maid Franziska Förster mielde ja dalle muitalii son ahte Kárášjoga kirku hálddahusas olgguštit su. Mun dáhtun ahte bealátkeahtes ásahus guorahallá ášši. Mun dáhtošin beassat diehtit manin rikkerejit, muitala Kirsten Larsen / Mákká Kirste.
Álbmotčoahkkinbreavas, man vihtta olbmo leat vuolláičállán, bivdet bargoaddiid guorahallat Kárášjoga searvegottehálddahusa unohis bargodili.
– Sáhttit veahkehit
Doaibmi sátnejođiheaddji, John Nystad, lohká nu mo son lea ádden, de ii leat Kárášjoga gielda searvegottehálddahusa bargoaddi.
Čilge bargoaddi suohkanbáhppii lea proavás ja kirkoverdde kirkolaš bargiide.
– Bargoaddiin lea dás hástalus čoavdit unohis bargodili vai bargodilli buorránivččii. Gielddas ii leat bargoaddiovddasvástádus. Kirku sáhttá jearrat veahki gielddas dahje earáin. Go juo lea sádden kopiija dan reivves gildii, de lea mu ávžžuhus ahte čielggadit ášši, ánodit ja rohkadallet searvegotti ovddas, lohká Kárášjoga doaibmi sátnejođiheaddji, John Nystad.
Bargobirasdoaimmat
Kárášjoga searvegotti beaivválaš jođiheaddji, Åsmund Samuelsen, muitala sii leat mannan dálvvi geahččalan čoavdit váttisvuođaid searvegottehálddahusas.
Sis leamaš bargoveaga ovdánahttinprográmma ja organisatoralaš bargu jođus.
– Mis leat dáppe guokte bargoaddi. Ii oktage leat láitán bargobirrasa dáppe. Mis lea maid suodjalanáittardeaddji. Nu mo lean ádden, de lea báhppa ja muhtin bargi geat eaba leat leamaš ovttaoaivilis, lohká Åsmund Samuelsen ja muitala soai Franziska Försteriin leaba bures gulahallan.
Samuelsen lohká mii guoská báhpa ja proavvása gaskavuhtii, das ii dieđe maidege.
Muitala eai boares olbmot leat moaitán go sii leat boahtán kirkui Ipmila sáni gullat.
Franziska Förster lei maid máilmmi čeahppi mánáiguin ja nuoraiguin, oaivvilda son.
Báhpa haga
Kárášjoga searvegotti beaivválaš jođiheaddji, Åsmund Samuelsen, muitala Kárášjogas ii leat dál báhppa.
Muhto Kárášjoga searvegottis lea proavás, Egil Lønmo, sadjásaš báhppa Lars Haugan ja proavásbáhppa Jan Høifødt.
– Go fitnen Romssas, de jerren bismagotteráđis áigot go almmuhit virggi rabasin. De ožžon vástádusa ahte eai almmut virggi rabasin go lea heajos ruhtadilli, lohká Samuelsen.
Sis-Finnmárkku proavvása, Egil Lønmo, eat ožžon ságaide go son lei čoahkkimis.
