Borgemánu boahtte jagi galget 25 sápmelačča oaiveskálžžu hávdaduvvot.
Ruoŧa Sámedikki etahlaš ráđđi lea mearridan ahte borgemánu 9. beaivvi 2018, galget 25 sápmelačča oaiveskálžžu hávdáduvvot Gammplatsen dahje goahtesadjái Likšui, čállá svt.se.
Hávdádeapmi galgá leat riikkaidgaskasaš eamiálbmotbeaivvi 2018:s.
Sámedikki ráđđelahttu Mikael Jakobsson muitala dát áššái lea stuorra beroštupmi ja earret hávdádeami, de áigu Sámediggi lágidit logaldallamiid ja soaitá maid lágiduvvot seminára.
Son lohká dás lea juridihkalaš áššit maid ferte čielggadit.
Ain lea eahpečielggas lea go hávdeeana bassi báiki dán áiggi ja vaikko oaiveskálžžuid dolvo eret das arkeologalaš roggama bokte, de ferte oažžut vuos lobi daid ruovttoluotta bidjat.
– Eat mii sáhte vuordit ahte buot olbmobázahusat gávdnojit
Earret oaiveskálžžuid, de dolvo maid eret olu dákterikkebázahusaid, muhto eai leat gávdnan visot man ge museas.
–Eat mii sáhte vuordit ahte buot olbmobázahusat gávdnojit, muhto oaiveskálžžut galget hávdáduvvot eatnamiid, lohká Sámedikki ráđđelahttu Mikael Jakobsson.
