Hástala boahtit Petter Northuga Guovdageidnui

Petter Northug mannan mánu lei iežas Facebooka siiddu bokte almmuhii filmmaža mas muitala ahte jus su siidu oažžu 400 duháha čuovvoleaddji ovdal go nohká dán jagi čuoiganáigodat mii lea boahtte mánu gaskkamuttus, de čuoigi čađaha hástalusa maid čuovvoleaddji evttoha. Lassi kriterian lea dat ahte evttohuvvon hástalus galgá oažžut ollu fuomášumi eará olbmuid gaskal.

Guovdageaidnulaš boazodoalli Mikkel N. Eira lea ge searvan dása go almmuhan iežas kommentára filmmaža kommentárafealttas.

– Don berret Therese Johaugain dahje eará čuigiin boahtit Guovdageidnui ja gilvvohallat nubbi nuppi vuostá heargevuodjimis beassášlávvordaga. Dát livččii suohtas, čálii Mikkel N. Eira.

Eira hástalus lea ožžon ollu fuomášumi, muhto birrasiid 1000 jiena eambbo lea dassážii ožžon eará olbmo hástalus mas dat hástalit Northuga searvat MMA nammasaš doarrungilvui. Dan birra Mikkel N. Eira oaivvilda ná:

– Mun in dieđe dien, muhto dies gal soaitá cápmahallá beali heagii.

Ii leat vuosttaš háve

Dat ii leat vuosttaš háve go Petter Northug lea bovdejuvvon Guovdageidnui. Diibmá ges go beassášlávvordaga ledje Guovdageainnus nubbin maŋemus heargegilvu Sámi Heargevuoddjin Lihttu cupas. De Norgga beale beakkán heargeeaiggát ja vuoddji, Ánne Risten Gaino Sara, lei ge skeŋken beali «Thug» nammasaš hearggis Norgga riikajoavkku čuoigái Petter Northugii. Gaino Sara lei dalle dieđihan «Thug» rabasluohkkái ja vuoddjin lei dieđihan Petter Northug.  Muhto Petter Northug manageris Are Sørum Langås eai lean buorit ságat dalle.

– Dađi bahábut ii sáhte Petter Northug boahtit Guovdageidnui vaikke lea stuorra gudni eaiggádit oasi hearggis. Muhto ollu fertet biehttalit, go son ferte vuoruhit čuoiganhárjehallama ovddemužžii, go dainna son eallá ja birge, dadjá Langås. Son liikká oalát ii hilggo jurdaga ahte oktii boahtit davás jus nu heive. Soaitá eará háve sáhtit boahtit vuodjit heargegilvvuin, muhto ii dán háve, lohká son loahpas.