Norgga riikajoavkkočuoigi Petter Northug ii sáhte boahtit beassášlávvordaga gilvalit herggiin «Thugain».
Beassášlávvordaga lea Guovdageainnus nubbin maŋemus heargegilvu Sámi Heargevuoddjin Lihttu cupas. Norgga beale beakkán heargeeaiggát ja vuoddji, Ánne Risten Gaino Sara, lea ge skeŋken beali «Thug» nammasaš hearggis Norgga riikajoavkku čuoigái Petter Northugii. Gaino Sara lea dieđihan «Thug» rabasluohkkái ja vuoddjin lea dieđihan Petter Northug. Ánne Risten Gaino Saras lei ain doaivva odne maŋŋel gaskabeaivvi ahte Northug sáhttá boahtit.
Ávvira vuorkágovva
Ii sáhte boahtit
Iežas lohká ferten dieđihit Petter Northug vuoddjin áigemeari dihte, vaikke ii diehtán sáhttá go boahtit.
– Mun lean bovden su boahtit gilvalit Thugain beassášlávvordaga Guovdageidnui, muhto in leat vel gullán maide. Lea ain buorre doaivva ahte son boahtá, dadjá Ánne Risten Sara.
Muhto Petter Northug manageris Are Sørum Langås eai lean buorit ságat.
– Dađi bahábut ii sáhte Petter Northug boahtit Guovdageidnui vaikke lea stuorra gudni eaiggádit oasi hearggis. Muhto ollu fertet biehttalit, go son ferte vuoruhit čuoiganhárjehallama ovddemužžii, go dainna son eallá ja birge, dadjá Langås. Son liikká oalát ii hilggo jurdaga ahte oktii boahtit davás jus nu heive. Soaitá eará háve sáhtit boahtit vuodjit heargegilvvuin, muhto ii dán háve, lohká son loahpas.
De ii searvva
Ánne Risten Gaino Sara lohká ahte das šaddá váikkuhus ahte son geassá Thug eret gilvvuin go Petter Northug ii sáhtán boahtit vuodjit.
– Lean juo mearridan ovdagihtii ahte jus Petter ii boađe, de in searvva Thugain gilvui, muitala Gaino Sara.
Ávvira vuorkágovva
SHL presideanta Mikkel Per Sara mielas lea šállošahtti go Petter Northug ii boađe.
– Son dieđus livččii geasuhan ollu gehččiid, nu ahte dan ektui lea šállošahtti. Muhto dan ferte maid dohkkehit, dadjá Sara.
Gilvvut šaddet liikká
Heargegilvvut šaddet liikká Guovdageainnus dáid beassážiid maid. Dal leat ge vel guokte oassegilvu heargevuodjimis ovddal vuoiti čielgá. Beassášlávvordaga lea Guovdageainnus Sámi Valáštallanpárkkas goalmmát oassegilvu 1000 mehter maid Duottar Hearggit lágidit, ja maŋemus ja njealját oassegilvu 200 mehter sprintta lea Mázes cuoŋománu 11. beaivvi. Máze Hearggit lágidit Mázesprinta.
SHL presideanta Mikkel Per Sara lea rámis iežaset World Cupain (WC) go leat buorit ruhtavuoitit.
– Mázes juhkkojuvvojit WC bálkkašumit. Dat gii vuoitá oačču 20.000 Norgga ruvnna, nuppi sajis lea 15.000 ruvnna ja golmmat sajis ges 10.000 ruvnna. Ruhtavuoittut muđui leat 4. sajis gitta 10. sadjái, ja lassin daidda leat maid ruhtavuoittut juniorluohkás. Dieđusge WC pokálat sihke báhkkaluohkás ja juniorluohkkás. Muđui juohká lágideaddji searvi oassegilvuvuoittuid, rámpo Mikkel Per Sara.
