Ráhkat video mas sámásta ja almmut dan instagrámmii, nu ávžžuha Sanna Vannar, Sámegiellaguovddážis.
Video go sámástat galgá gaskal minuvtta ja golbma guhku ja sáhttá maid sáddejuvvot su mailii, čilge Ruoŧa Sámedikki Sámegiellaguovddáža prošeaktajođiheaddji Sanna Vannar. Jus bijat instagrámmii, de geavat gilkora #giällagilvu.
– Mii válljet golbmasa geat vuitet earret eará falástallandiimmu ja gállolámppá. Mis lea joavku mii vállje buoremus filmmaid mat leat sámegillii. Ulbmil lea ahte sámegiella galgá gullot ja oidnot sosiálá medias dán vahku, muitala Vannar.
Eahkesprográmma
Sámegiellaguovddázis lea prográmma olles vahku maid sáhttá čuovvut neahta bakte. Earret eará sis leat giellaeahkedat buot sámegielain mat gávdnojit Ruoŧa bealde.
– Elli-Karin Pavval ja Inga Pirak Hedström muitaleaba julevsámegillii ja juogadeaba muittuid mánnávuođa birra. Davvisámegieleahkedis Kjell Marainen muitala iežas eallima birra ja makkár vejolašvuođaid sámegiella lea sutnje addán ja man dehálaš lea geavahit sámegiela. Ubmisámegieleahkeda Sophia Rehnfjell lohká iežas ođđa girjji Gájuoh Muv! Almmie ja Enok luhtte, ja maŋŋel dan lea ságastallan, muitala prošeaktajođiheaddji Sanna Vannar.
