Ruoŧa Sámedikki Duohtavuođakommišuvdna sádde ávžžuhusa ráđđehussii ja Riikaarkiivii ahte vurkkodit iežaset boahttevaš arkiivva.
Kommišuvdna háliida dál juo čielggadit ja mearridit ahte arkiiva galgá vurkkoduvvot Ája sámi girjerádjosis ja arkiivvas Ájttes Johkamohki, maŋŋel go kommišuvnna bargu lea loahpahuvvon.
Kommišuvdna lohká leamaš čielga sávaldaga sámi siviilaservvodagas, ovttaskas sápmelaččain ja gulahallančoahkkimiin ahte jearahallamiid jietnafiillat ja čállosat, maid kommišuvdna lea čađahan, ja galgá čađahit, galget vurkejuvvot sámi arkiivii, muhto dálá lágaid mielde galgá kommišuvnna arkiiva vurkejuvvot Riikaarkiivii maŋŋel go bargu lea čađahuvvon.
– Gažaldat gosa jearahallanmateriála galgá vurkejuvvot boahtteáigái váikkuha dasa man ollu ja maid min gáldut muitalit. Sámi álbmoga Duohtavuođakommišuvdna doallá jearahallamiid 2023:s ja vuosttaš oasis 2024:s, ja danne lea hoahppu ahte gažaldat gosa vurkkodit jearahallanmateriála boahtteáiggis geahččaluvvo dál iige maŋŋel go kommišuvnna bargu lea loahpahuvvon, dadjá kommišuvnna jođiheaddji Kerstin Calissendorff preassadieđáhusas.
