Háliidit sámegiela hálddašanguvlui

Gielda háliida rabas gulaskuddama ja ovdagoddi geigii bajásgeassinlávdegoddái dutkat čuovvovaš áššiid: Sáhttá go oassi gielddas vai ferte go olles gielda mielde, makkár váikkuhusat bohtet gieldda ásahusaide, makkár doaimmaid ferte álggahit, tulkabálvalusdárbu, sámegiel áššebáhpárat, ekonomalaš dilli.

Ulbmil beassat hálddašanguvlui

Gielda lea bidjan dán guorahallama johtui vai ožžot doarvái dieđuid mearridit dán áššis, čállá Plassje gielda skábmamánu 23. beaivvi.

Ulbmil beassat sámegiela hálddašanguvlui lea čalmmustahttit sámegiela almmolašvuođas.

Beroškeahttá leago gielda olggobeal dahje siskkobeal giellahálddašanguovllu, de lea gielddas geatnegasvuohta láhčit sámi álbmogii dili nu ahte sápmelaččat sáhttet sihkarastit ja ovdánahttit iežaset giela, kultuvrra ja servodateallima. Gieldda geatnegasvuohta lea garrasut siskkobeal go olggobeal hálddašanguovllu.

Čoahkkinastán Sámedikkiin

Lávdegoddi lea guorahallan makkár ásahusat leat juo Røros gielddas ja makkár gelbbolašvuohta sis lea sámegiela ja sámi kultuvrra ektui, erenoamážit dearvvašvuođabargoveagas, oahpaheddjiin, mánáidgárddebargoveagas ja hálddahusas.

Lávdegoddi lea maid čoahkkinastán Sámedikkiin ja dan hálddahusain, sihke politihkkáriiguin ja fágaolbmuiguin, ja maiddái Snoasa ja Raarvihken gielddain.

Plassje sádde dál ášši rabas gulaskuddamii ovdal go meannuduvvo gielddastivrras. Áigemearri lea golggotmánu 31. beaiv i 2016.