Investorjoavku maid Amerihká Goldman Sachs jođiha fállá 17,2 miljárdda ruvnno Norgga quiz-fitnodaga, Kahoot, ovddas. Dássážii lea oasushaddi gorgŋon logi proseantta dan rájes go fálaldat bođii.
Kahoot lea e-oahppanlávdi mii almmuhuvvui njukčamánus 2013:s. Geavaheaddjit sáhttet sihke ráhkadit ja čađahit quizzaid, ja geavahuvvo dávjá skuvllain. 2017:s olahedje badjel miljovnna geavaheaddji.
Bursadieđáhusas bearjadaga čállá Kahoot ahte sii ávžžuhit fálaldaga sin eaiggádiidda, geat ožžot 35 ruvnno juohke ossosa ovddas. Dát haddi lokte fitnodaga bursaárvvu 17,2 miljárdda ruvdnui, dálá árvu lea 15,3 miljárdda.
Goldman Sachsii lassin namuhuvvojit General Atlantic, KIRKBI Invest, Glitrafjord AS ja eaŋkilinvestorat investorjoavkkus mat leat buktán fálaldaga. Fálaldat lea dahkkon ođđa Norgga fitnodaga čađa, Kangaroo BidCo, maid Goldman Sachs lea ásahan.
(©NTB)
