Sámediggeráđđi evttoha várret miljovnna kruvnna árbedihtui boahtte jagi bušeahttaevttohusas.
Sámediggeráđđi evttoha várret miljovnna kruvnna árbedihtui boahtte jagi bušeahttaevttohusas.
– Árbediehtu ovddasta dehálaš oasi sámi kulturárbbis. Dáinna juolludemiin sihkkarastit mii buriid proseassaid main buot áššebealit ožžot rolla ovttasbarggus dokumenteret ja seailluhit sámiid oktasaš máhttovuorkká, lohká sámediggeráđđi Thomas Åhren preassadieđáhusastis.
Máhttohuksen
Dássážii lea aktevrraid bargojuohkin leamaš eahpečielggas, ja vurdojuvvo ahte bargojoavku dahká vuđolaš barggu rollajuohkimiin boahtteáiggis. Ráđđi evttoha vuođđudit bargojoavkku mas leat sámi museaid, Sámi allaskuvlla, Sámi Arkiivva, sámi guovddážiid/organisašuvnnaid/ásahusaid fágaolbmot mat barget árbediehtosurggiin, ja Sámedikkis.
– Mii evttohit ahte miljovnna ruvdno galgá mannat dán dehálaš bargui boahtteáiggi máhttohuksema várás, duođašteami ja gaskkusteami várás, lohká Åhren.
Áigemearri boahtte jagi
Bargojoavku galgá čielggadit boahtteáiggi barggu dokumenteremiin, olahanmuddui dahkamiin ja geavahemiin sámi árbedieđus. Sámediggeráđđi háliida ahte bargojoavku dasto oažžu viiddis vuođu ja sajáiduvvá ásahusain main lea árbediehtu oassin ovddasvástádusas. Vuođđudeapmi lea oassin Sámediggeráđi bušeahttaárvalusas 2017 ovddas.
Áigemearri geiget raportta lea juovlamánu 31. beaivve 2017.
– Mii háliidit ahte buohkat geaidda ášši gullá galget leat fárus dán bargojoavkkus nu ahte das lea viiddis vuođđu ja dan bokte sajáiduvvá buot ásahusaide main lea árbediehtu oassin ovddasvástádusas, deattuha Åhren.
