Máhttoministtar Torbjørn Røe Isaksen háliida ahte doaresbeale suohkanat galget oččodit oahpaheaddjestudeanttaid bargui, ovdal go gerget oahpuin.
Máhttoministtar Torbjørn Røe Isaksen háliida ahte doaresbeale suohkanat galget oččodit oahpaheaddjestudeanttaid bargui, ovdal go gerget oahpuin.
– Mii dárbbašit eambbo suohkaniid mat jurddašit offensiivvalaččat, mat movttiidit eambbosiid álgit oahpaheaddjeohppui ja mat fállet barggu studeanttaide, lohká máhttoministtar Torbjørn Røe Isaksen preassadieđáhusas Romssa universitehtii.
Gullame oaiviliid
Máhttoministtar lei davvin gullame makkár oaivilat suohkaniin, studeanttain ja Romssa universitehtas leat.
Son háliidii gullat movt ráđđehus sáhttá veahkkin vai rekrutteren lassána oahpaheaddjeohppui.
Bearjadaga lei juo vuosttaš doaibma sajis, oahpaheaddjestudeanttat ožžot sihkkojuvvot beali studeantaloanas jus váldet masteroahpu 1.-7. ceahkis.
Ministtar oaččui maid dieđu ahte ferte eará ládje hástalit go dušše ekonomalaččat.
– Mun ožžon ipmárdusa ahte eanas studeanttat Romssas ja Álttás háliidit bargat iežaset ruovttubáikkis. Hástalus lea ahte eai leat barggut go gerget oahpuin, lohká Røe Isaksen.
Offensiivvalaččat jurddašit
Ministtar deaivvadii maid skuvlaeaiggádiiguin mátkkis, ja son sávai ahte suohkanat álget offensiivvalaččat jurddašit.
– Lea alla gaskamearálaš ahki oahpaheddjiin. Jus suohkanat dihtet ahte virgi rahppo moatti jagi geahčen, seammás go báikki olmmoš lea oahpaheaddjeoahpus, de fertejit árvvoštallat fállat barggu studentii dan beaivvi rájes go geargá oahpus. Jus vurdet dassážii go virgi rahppo, de sáhttá studeanta gávdnan barggu eará sajis, ja sáhttá gollat áigi dassá go nuppes lea báikkiolmmoš oahpaheaddjeoahpus, lohká Røe Isaksen.
