Ođđa oaiviliskkadeapmi čájeha ahte dušše Gurutbellodat ovdána Stuoradikki borgárlaš bellodagain.
Ođđa oaiviliskkadeapmi čájeha ahte dušše Gurutbellodat ovdána Stuoradikki borgárlaš bellodagain.
Skábmamánu oaiviliskkadeapmi čájeha ahte Gurutbellodat lea masá beali stuorát go Risttalaš álbmotbellodat.
Jus dál livččii stuoradiggeválga, de livččii Gurutbellodat ožžon 5,9 proseantta jienain, ja lassáneapmi ovddit mánu rájes lea 1,1 proseantta.
Ráđđehusa nubbi ovttasbargobellodat gal njiedjá 0,1 proseanttain, Risttalaš álbmotbellodat oččošii dušše 3,1 proseantta jienain, čájeha TV2 oaiviliskkadeapmi man Kantar TNS lea čađahan.
Ráđđehus massá maid jienaid
Oaiviliskkadeapmi čájeha ahte goappašat ráđđehusbellodagat maid masset jienasteddjiid.
Ovddádusbellodat manná 0,4 proseantta maŋos ja oččošii 12,7 proseantta jienain jus dál livččii válga.
Olgešbellodat lea ain stuorámus bellodat Norggas, muhto dattetge manná eanemus maŋos. Sii massášedje 2,3 proseantta jienasteddjiin, ja bisánit danin 26,9 prosentii.
Ovdána ain
Guovddášbellodat šattai válggaid stuora vuoitin, ja bellodat ovdána ain eanemus. Sii oččošedje 11,5 proseantta jienain, lassáneapmi lea 2,2 proseantta.
Maiddái Sosialisttalaš Gurutbellodat ovdána 7,4 prosentii. Ná stuora doarjja ii leamaš bellodagas gávcci jahkái.
Ruoksat fas ovdána dan mađe ahte oččošii nuppi stuoradiggeáirasa.
Massášii stuoradiggesaji
Oaiviliskkadeapmi lea oalle dramáhtalaš Ruoná birasbellodaga ektui, sii mannet dan mađe maŋos ahte massášedje iežaset stuoradiggeáirasa jus dál livččii válga.
Bargiidbellodat rahčá ain, muhto massá dušše 0,1 proseantta jienain.
Bargiidbellodat bissu ain Norgga nubbin stuorámus bellodahkan 25,3 proseantta jienain, čájeha TV2:eš oaiviliskkadeapmi.
