Eai goasse ovdal leat nu unnán olbmot duššan luottaid alde guovvamánus go dál.
Okta olmmoš duššai johtolagas guovvamánus. Dat lea njeallje unnit go diibmá, ja unnimus lohku duššamis guovvamánus goassege.
Dán rádjái leat viđas duššan johtolatlihkohisvuođain Norgga luottain dán jagi.
10 jagi áigi dušše 14 olbmo guovvamánus
Guovvamánnu lea mánnu go leat hui rievddadeaddji duššanlogut johtolagas. Logi jagi áigi ledje 14 geat dušše luottaid alde guovvamánus, ja jagi maŋŋel ledje čiežas, muhto eai goasse ovdal leat leamaš nu unnán go dán jagi.
– Dat lea movttiidahtti álgu jagis midjiide geat bargat johtolatsihkarvuođain, dadjá Guro Ranes, Stáda geaidnodoaimmahaga johtolatsihkarvuođa jođiheaddji, preassadieđáhusas.
– Okta duššan guovvamánus, lea okta beare olu. Go viđas leat duššan jagi guovtti vuosttaš mánus, lea maid vihtta beare olu. Muhto jus eat geahča 2022, go lei pandemiija jagi álggus, de eai leat goasse leamaš unnit johtolatduššamat go čállit njukčamánu 1. beaivvi, dadjá son.
Gáibideaddji dálvi – čeahpes vuoddjit
Lea vuos beare árrat dadjat mii lea dagahan unnán johtolatlihkohisvuođaid dán jagi, muhto Ranes dadjá ahte olu ja gáibideaddji dálvedálkkit sáhttet leat čilgehussan dasa.
– Johtaleaddjit leat leamaš čeahpit muddet leahtu siivvu mielde dán dálvvi, ja leat vuodján várrogasat dahje orron ruovttuin go dálki lea leamaš. Mu sávaldat johtaleddjiide lea joatkit nu, dadjá Guro Ranes.
– Mudde leahtu siivvu mielde, ale vuoje gárrenoaivvis, geavat biilaboahkána ja leage áicil luddii; ja vuodjit lea dat áidna maid galggat dahkat.
