Vaikko lea leamašan veaháš eahpesihkar, de šaddet dán jagi maid Guovdageainnus Sámi álbmotbeaivvi ávvudeamit, nu go buot eará jagiid.
Suohkanis leat dán jagi leamaš hástalusat oažžut lágideddjiid Sámi álbmotbeaivvi almmolaš doaluide, muhto vahkkoloahpas lea ášši čoavdašuvvan ja Guovdageainnu skohtersearvi lágida doaluid árbevieru mielde Báktehárjjis.
– Min mielas lea dehálaš ahte šaddet ávvudeamit Guovdageainnus maid ja danne lágidit mii doaluid. Ferten rámpot Guovdageainnu servodaga ja olbmuid dan dáfus man olu veahki mii leat ožžon ja man stuora dáhttu olbmuin lea oažžut doaluid sadjái, lohká Guovdageainnu skohtersearvvi jođiheaddji, Nils Johan Vars. Son bargá beaivválaččat Ávvira journalistan, muhto lea dál mielde lágideame Guovdageainnu doaluid.
Doalut Báktehárjjis álget diibmu 15.00. Álbmotbeaivvi sártniid doallaba Guovdageainnu sátnejođiheaddji Anders S. Buljo ja Sámedikki ovddasteaddji. Nu go dábálaččat, de geigejuvvo Guovdageainnu suohkana kulturbálkkašupmi doaluin.
– Doaluin lea maid vuosttaš geardde go ođđa luohti gullo, muitala Vars, muhto ii vuos muital duođi eambbo dan birra.
Báktehárjjis lea kaféa gos vuovdet biđđosa, gáhkuid ja gáfe ja lágideaddjit sávvet ahte olbmuin šaddá buorre dilli doaluin ja beasset čoahkkanit, deaivvadit ja humadit.
