Njeallje kulturviessoprošeavtta Finnmárkkus besset dál illudit go daidda juolluduvvo speallanruhta.
Dán vahkku juhkkojuvvui badjelaš 6,1 miljovnna ruvnno iešguđet kulturviessoprošeavttaide fylkkas. Dat mearriduvvui mánnodaga kultuvrra, álbmotdearvvašvuođa ja johtalusa váldolávdegotti čoahkkimis.
Buot ohcamušaide juolluduvvui doarjja.
Ovdánahttet kultureallima Finnmárkkus
Lea čájehuvvon ahte doarjagiin lea stuora ávki Finnmárkku kultureallima ovdáneapmái.
– Hui illudahtti oaidnit ahte doarjja lea mielde ovdánahttime kultureallima sihke báikkálaččat ja regionálalaččat Finnmárkkus, dadjá váldolávdegotti jođiheaddji, Geir Ove Bakken preassadieđáhusas.
Unnán ohccit
Ovddit jagiid leat fylkkasuohkanii boahtán hui unnán ohcamušat suohkaniin, joavkkuin ja servviin. Ohcanjagit 2016, 2017 ja 2018 čájehit ahte eambbosat leat gullan dán doarjjaortnega birra, muhto ahte sáhtášii šaddat vel buorebun. Dušše guokte ovccinuppelogi suohkanis leat ohcan dán jagi.
Hástala ohcat doarjaga
Bakken háliidivččii ahte suohkanat galget vuoruhit barggu dakkáraš doarjjaortnegiin.
– Leat unnán suohkanat mat bidjet návccaid ja gelbbolašvuođa dakkár bargui. Muhtun suohkaniin leat huksen kulturviesu vaikko eai leat ohcan doarjaga ge, dadjá son.
Dán jagáš juolludeapmi prošeavttaide šattai ná:
Ohcci | Suohkan | Ohcansupmi | Doarjja | |
Lakkovuonbađa servvodatviessu kulturviessu | Lákkovuona servodatviessu | Áltá | kr 170 000 | kr 170 000 |
Čhácesullo kino | Čáhcesullo gielda | Čáhcesuolu | kr 2 000 000 | kr 2 000 000 |
Hárjehallanlanjat máŋggageavahusviessu | Čáhcesullo gielda | Čáhcesuolu | kr 2 000 000 | kr 2 000 000 |
Čáhcesullo kulturlatnja | Čáhcesullo gielda | Čáhcesuolu | kr 2 000 000 | kr 2 000 000 |