Norwegian girdipilohtat leat ain bargoheaitagis, ja dat čuohcá 20.000 mátkkošteaddjái odne. Bargoheaitta ii hehtte sámediggeáirasa Mariann Wollmann Magga, soai isidin máksiba lasi ja mátkkošteaba Suoma bokte vai beassaba lupmui.
Bargiidbellodaga sámediggeáirras Mariann Wollmann Magga lea isidin ja muhtin ustibiiguin vuolgimin luomostállat Ungarna oaivegávpogii Budapestii. Sii galge váldit Norwegian girdi Osloi gos viidáset mátkkoštit olgoriikii, muhto girdifitnodaga pilohtat leat bargoheaitagis ja girdijohtolat lea bisánan eanaš guovlluin Skandinavias.
– Mii leat čuvvon ođđasiin bargoheaitaga ovdáneami. Ovtta gaska orro bealit soabadallamin, ja optimisma badjánii. Dattege šattaimet vuollánit ja ohcagoahtit eará čovdosiid, čilge Magga.
Golbma diimmu biillas
Mariann Wollmann Magga ássá dušše 10 minuhtta eret Mátta-Várjjaga girdišilljus, muhto go mátkeplánat rivde gártá mátki girdišilljui golbma diimmu.
– SAS girdit dievvagohte ja bileahtat divro. Isken Finnair girdifitnodagas bileahtaid, ja vaikke Avvilii lea veahá mátki de vuodjit dohko biillain ja girdit Suoma bokte Osloi, muitala son.
Bargoheaitta váivvida
Norwegian fitnodaga girdipilohtat leamaš bargoheaitagis ovddit lávvardaga rájes. Badjel 700 pilohta streikejit, ja dat lea čuohcan sullii 200.000 mátkkošteaddjái. Árvvoštallojuvvo ahte girdifitnodat lea manahan miljárddabeali ruvnnu dietnasa.
– Diehttelasat lea láittas go bargoheaitta čuohcá, muhto ádden ahte pilohtat dáhtot buoret bargodili. Lean ádden ahte bealit leat máŋga mánu geahččalan šiehtadallat, lohká mátkkošteaddji Mariann Magga Wollmann Magga.
Mátki divru
Mariann Wollmann Magga ja su isida mátki ii dušše guhko, mátki šaddá maiddái divraset.
– Lean dáhkidan Norwegian fitnodagain ahte ožžo ruđaid ruovttoluotta, muhto mátki Finnair mielde divruda tuvrra sullii 2000 ruvnnuin. Dattege nu illudan lupmui ahte fertejin oastit ođđa girdibileahtaid. Ruoktot gal beassat go dalle mátkkoštat SAS fitnodagain, muitala Magga.
Ávvir lea geahččalan váldit oktavuođa Norwegian preassaguovddážiin, muhto eat lea ožžon vástádusa go nu oallugat riŋgejit. Interneahttasiiddus šálloša Norwegian go bargoheaitta čuohcá mátkkálaččat, sii dáhtot olbmuid čuovvut mielde interneahta ja teakstadieđuid bokte mo streaikaášši ovdána. Mátkkálaččat galget riŋget girdifitnodahkii vai besset rievdadit bileahtaid dahje oažžut ruđaid ruovttoluotta.
