«Viidnevuošši» lávlu ii ožžon ruhtadoarjaga almmuhit CD-skearru, muhto son ii leat vel vuollánan dan dihte.
«Viidnevuošši» lávlu ii ožžon ruhtadoarjaga almmuhit CD-skearru, muhto son ii leat vel vuollánan dan dihte.
Nils Mathis A. Skum muitalii diibmá geasi ahte lea čálligoahtán ođđa lávlagiid ja pláneme almmuhit CD-skearru. Son ozai doarjaga Sámedikkis, muhto ii liikostuvvon. Váikko ii leat vel ožžon doarjaga, de son ii aŋkke leat vuollánan.
— Mii eat dađibahábut ožžon doarjaga diibmá almmuhit CD-skearru nu go lei hupmu. Muhto mii leat dál geahččalan ohcat ođđasit, ja dál mun doaivvun buoret vejolašvuođaid oažžut go min čuojaheaddjis lea čuojahanfitnodat gos beassat báddet lávlagiid. Orun dovdame gamus ahte dál njuolga ja manna bures, muitala son. Skum doaivu ahte ožžot vástádusa Sámedikkis čakčamánus.
Ii váldán nu lossadit
Vaikko diibmá eai liikostuvvon nu go lei jurdda, ja ii gullogoahtán márkanis nu go lei lohkan háliidit. De son ii váldán dan nu lossadit.
— Go eat ožžon doarjaga Sámedikkis, de mun válden gulul. Ii dat munnje čuggen dál dette nu garrasit go mun lean dan mutto eallilan olmmoš, in mun dainna jierásnuvvon. Muhto dat lea hui bahá nuorra Sámi artisttaide ahte vuollánit musihkain bargamis jus eai oaččo doarjaga, go musihkain han lea váttis bargat ruđa haga, dadjá Skum.
Son maid muitala jus galgá šaddat buorre musihkka mas lea gitára, bássa ja rumbbut, de ferte oažžut sullii 150.000 ruvnno doarjaga CD-skerrui.
DIIMMÁ ÁVVIR: Diibmá čálii Ávvir ahte Nils Mathis A. Skum áigu fas gullogoahtit márkanis go lei
pláneme almmuhit CD-skearru. Dál lea son šaddan maŋidit almmuheami dan sivas go ii leat ožžon doarjaga.
Gullogoahtá radios
Nils Mathis A. Skum muitala ahte sus álga gullogoahtit áibbas ođđa lávlla Nrk Sámis, son lohka ahte dat «Vilda stevvel» lávlla sáhttá veahá muittuhit dan bivnnuhis «viidnevuošši» lávlaga.
— Mii galgat sáddet ovtta lávlaga Sáme radioi mii álgá gullogoahtit guovtti vahkku geahčen. De olbmot besset gullat makkár lávlagat mis aittonassii oba leat ge. Dat «vilda stevvel» lávlla lea mus dego dat «viidnevuošši» lávlla. In leat ieš čállán dan lávlaga, muhto lean šaddan heivehit sániid musihkkii ja nie. Dát lea mu mielas issoras buorre lávlla, ja dat lea heivejuvvon vaikko geasa, čilge son.
