Nu lohkaba guokte sápmelačča geaiguin Ávvir lea hupman Norgga gonagasa, Majestehta Gonagas Harald, 80 jagi beaivvi oktavuođas.
Nu lohkaba guokte sápmelačča geaiguin Ávvir lea hupman Norgga gonagasa, Majestehta Gonagas Harald, 80 jagi beaivvi oktavuođas.
Sámi girkoráđi jođiheaddji Sara Ellen Anne Eira lea aiddo deaivvadan gonagasain, go lei Tråante doaluid oktavuođas váldime vuostái gonagasa.
Eira muitala iežas leamaš veaháš balus álggos, muhto lohká gonagasain lei hui álki hupmat.
– Ii lean nu ollu áigi ságastallat gonagasain, muhto son čájehii stuora beroštumi Nidarosdomena sámi áltárii, ja jearahii mus movt mun oainnán movt dat lea sámi áltár, ja mun de čilgejin. Ii lean mihkkege várálaččaid deaivvadit gonagasain, go gonagas lea hui olmmošeaddjái ja mu mielas lea hui somá go čájeha beroštumi sámiide ja sámi áššiide, muitala Eira.
– Man dehálaš lea gonagas sápmelaččaide?
– Nu movt mun vuohtán iežan lagasbirrasis, de atnet sápmelaččat hui árvvus olles gonagasbearraša. In leat leamaš nu ollu dáčča vuorasolbmuid ruovttuin, muhto lean vuohttán go finan vuorrasit sápmelaččaid ruovttuin, de lea dávjá gonagasa dahje gonagasbára govva seainnis. In dieđe manne lea nu, muhto jáhkán mii leat veaháš rojalisttat, ja lea várra danne go olles gonagasbearaš lea čájehan stuora beroštumi sámi áššiide, ja danne dovdat ahte lea min sápmelaččaid gonagas maid, lohká Sara Ellen Anne Eira.
Luossaberošteaddji
Ovddeš sámediggepresideanta Egil Olli lea deaivvadan gonagasain máŋgii dan olis go lei presideanta.
Olli maid lohká sihke gonagasain ja dronnegiin lea hui álki humadit.
– Gonagas láve erenoamážit liikot háleštit luossabivddu birra, go lea ieš maid áŋgiris luossabivdi. Gonagassii lea dehálaš váldit vuhtii dan boares mearraluossabivddu, iige beare johkabivddu, muitala Olli.
(Ášši joatká gova vuolábealde)
Čaimmai nammaseaguhemiin
Olli muitá maid hui bures fearána go son Sámedikki rahpamis 2009:s gohčodii gonagas Haralda gonagas Ovllán.
– Go maŋŋel de čohkkedin biilii gonagas Haraldiin, ja muitalii ahte ledjen seaguhan namaid, de čaimmai son. Son jeđđii mu logai ahte in leat vuosttaš, inge maŋemus gii seaguhan namaid. Lean maŋŋil gullan ahte earát leat maid seaguhan gonagasaid namaid, na ahte dat lei duohta ahte in lean maŋemus, lohká Olli.
Olli lohkáge Sámedikki álggaheamis de lei Gonagas Ovllá rahpame, ja maŋŋel lea Gonagas Harald joatkán dan vieru.
– Leage šaddan árbevierrun, ja danne leage gonagasbearaš hui dehálaš sápmelaččaide, lohká Egil Olli ja háliida Ávvira bokte cealkit riegádanbeaidearvvuođaid Majestehta Gonagas Haraldii su 80-jagi beivviin.
Álbmot sáhttet cealkit dearvuođaid
Gonagasa riegádanbeaivvi oktavuođas sáhttet olbmot maid cealkit dearvvuođaid gonagassii, go de almmuhuvvo protokolla sihke šloahtas ja gonagasviesu ruovttusiiddus masa olbmot besset čállit dearvvuođaid.
Protokolla lea gávdnamis šloahta váldoboađáhaga luhtte, ja olbmot besset čállit girjái diibmu 14 rájes gitta 16 rádjái.
Sii geat eai sáhte protokollii čállit šloahta luhtte, sáhttet elektrovnnalaš protokollii čállit mii lea almmuhuvvon gonagasviesu neahttasiidui diibmu 06:00 disdatiđida. Protokolla gávnnat dás.
