Sámi Dáiddaguovddáš Kárášjogas rahppo dál suoidnemánus ja doppe leat golbma ođđa čájáhusat mat bistet gitta čakčii. Dan golmma čájáhusas leat sierra fáttat: «Bistilis ja beaktilis feaddáduddjon», «Jođi buoret go oru» ja «Oanehisfilmmat stuorra hámis». Dan čállá Sámi dáiddaguovddáš preassadieđáhusas.
Dán geasi háliida Sámi Dáiddaguovddáš čalmmustahttit dán duddjonvuogi ja daid čalbmáičuohcci feaddádujiid, duddjojuvvon gierdevašvuođain ja nana čeahpes gieđaiguin. Čájáhus lea buvttaduvvon ovttas Sámi Dáiddamagasiinnain mii čájeha dáidagiid čoakkáldagas ja Várjjat Sámi museain Unjárggas, gos leat luoikkahan dáiddadujiid.
Sámi Allaskuvla Guovdageainnus oassálastá maiddái dán ovttasbargui professor Gunvor Guttorma bokte. Son lea čállán teavstta, addán jearahallama ja luoikan iežas duijiid. Saemien Sijte lea luoikan muhtun govaid. Dás leat maiddái ođđasat feaddáduojit.
Duojárat čájáhusas leat Hjördis Löfgren, Margit Kitok Åstrøm, Gunhild Tjikkom, Fia Kaddik, Ellen Kitok Anderson, Tyyne Domna Foronoff ja earát. Čájáhussii dahkkojuvvo ođđa čájáhushábmen, ja oaidnit sihke govaid ja jearahallama filbmahámis mas čilgejuvvo duodjeproseassa álggus gitta lohppii.
Jođi buoret go oru
Govvideaddji ja journalista Elisabeth Meyer lei guhká vajálduvvon Norgga fotogovvahistorjjás. Su govat ledje 30 jagi čihkosis muhtun rájus.
– Mii illudat go beassat dál oasi Kárášjoga govain čájehit Sámi Dáiddaguovddážis. Govvaprošeakta lea leamašan lagaš ovttasbargu Kárenaš Sámi giella- ja kulturguovddážiin Kárášjogas. SVD/DSS Musea- ja Kárášjoga historjásearvi leat dahkan govaid identifiserema. Searvi lea máiddái čohkken muitalusaid ja luđiid mat čatnasit govaide, ja dan oktavuođas leatge jearahallojuvvon vuorrasat olbmot Kárášjogas. Dán barggu boađus lea allaárvosaš ja mávssolaš árbediehtu ja kulturárbi maŋit áigái.
– Mii oažžut dál leat giitevaččat dan áŋiris Gillevuona oahpaheaddjái Øystein Sundei, ja oaidnilis girjerádjoshovdii Sissel Jakolai Čáhcesullos, danin go lea sudno gudni ahte govat gárte Finnmárkku fylkkagirjerádjosa vuorkái 1999:s. Govvavuorkkás leat árvvu mielde 1600 originala negatiivva Elisabeth Meyera govain. Birrasii 600 gova leat govviduvvon sámeguovlluin, eatnašat Kárášjogas ja Guovdageainnus, čállá Sámi Dáiddaguovddáš preassadieđáhusas.
Oanehisfilmmat stuorra hámis
Sámi Dáiddaguovddáš lea bovden Ken Are Bongo ja Johan Sara juniora ráhkadit oanehisfilbmaprográmma mat čájehuvvojit Sámi daiddaguovddážis.
Čuovvovaš filmmat čájehuvvojit: «Sea Sámi, See» buvttadeaddjit leaba Johan Sara jr. ja Ken Are Bongo.
Filmma «Transmission» lea Johan Sara Jr. buvttadan ja dat lea maid oassin čájáhusas.
Seamma maid «Duorggat doarggistit» man Ken Are Bongo, Joar Nango ja Håvard Arnhoff leat buvttadan.
Čájáhusovttasbarggut Kárášjoga olggobealde
Sámi Dáiddaguovddážii bohtet olu gažaldagat, erenoamážit stuorra dáiddačájáhusaid lágideaddjiin miehtá máilmmi, museain ja earáin geat dárbbašit cavgilemiid dáiddáriid birra, ja geaid sáhtašedje bovdet oassálastit sin čájáhusaide.
Sámi Dáiddaguovddáš gaskkusta maiddái aktiivvalaččat iežas buvttaduvvon čájáhusaid eará čájehanbáikkiide ja arenaide.
Dán geasi čájehuvvo grafihkkačájáhus mas oassálastet 15 sámi dáiddára Galleri Espolin/Museum Nord lanjain Gávvalvágis. Dat nubbi čájáhus lea Mátta-Sámi dáiddár Tomas Colbegtsona glássadáidagat ja báccit mat čájehuvvojit Sijti Jarnge lanjain Árborddes.
