Eaktodáhtolaš beassedárkkisteaddjit ja Meahciráđđehusa Luonddubálvalusaid bargit dárkkistedje giđđat ja geassit goaskima bessemiid šlája leavvanguovllus.
– Goaskima bessenboađus lei fuotni dán jagi, dieđiha Meahciráđđehus.
Eaktodáhtolaš beassedárkkisteaddjit ja Meahciráđđehusa Luonddubálvalusaid bargit dárkkistedje giđđat ja geassit goaskima bessemiid šlája leavvanguovllus.
– Goaskima bessenboađus lei fuotni dán jagi, dieđiha Meahciráđđehus.
Geasi beassedárkkistemiin gávnnahedje dán jagi sulaid 370 ássojuvvon goaskinreviira. Bessenboađus lei fuotni measta oppa goaskima leavvanguovllus, dušše Kainuus dat lei buoret.
Dárkkistusain gávdne 101 lihkostuvvan bessema, ja dain buohkanassii 105 čivgga, mat ledje dan agis, ahte sáhtii bidjat rieggáid. Dán muitala Meahciráđđehus sin neahttasiiddus.
Stuora erohusat jagis jahkái
Sivva fuones bessemii lea hejos biebmodilli, eandalii vuoncceslottiid smávva mearri. Bessenbohtosa molsašuddan lea goaskimii dábálaš, ja muhtumin maŋŋálas jagiid gaskkas sáhttet leat stuora earut. Ovdamearkan jagi 2010 gávnnahedje oppa riikkas oktiibuot dušše 82 čivgga, muhto čuovvovaš jagi jo 239 čivgga.
Čieža ođđa reviirra
Suomas dihtet oktiibuot 534 goaskinreviirra ja dain assojuvvon leat maŋimuš viđa jagi áigge leamašan sulaid 450 reviirra. Dieđus lean reviirrain sulaid 80 proseantta leat Lappi eanagottis ja sulaid 90 proseantta boazodoalloguovllus. Jagi 2017 áigge leat gávdnan čieža ođđa goaskinreviirra.
Dárkkistit maid helikopteriin
Meahciráđđehus vástida goaskima beassedárkkistemiin ja goaskima boazodollui dagahan vahágiid reviiravuđđosaš buhttenvuogádaga gáibidan bargguin. Fuomášahtti stuorra oasi meahccebargguin dahket birasministeriija dán bargui fápmudan eaktodáhtolaš loddeberošteaddjit. Luonddubálvalusat dárkkista bealistis bessemiid maiddái helikopteriin.
Gávdnanbuhtadus mákso
Meahciráđđehus máksá árabut dovdameahttun goaskima beasis Davvi-Suomas almmuheaddjái 100 euro gávdnanbuhtadusa.
Goaskima áittavullosašklassifiseren lea VU dahjege vára vuolde, dieđiha Meahciráđđehus neahttasiiddus.
