Unjárgga oahppogáldu 8. luohká oahppit vuite «kultuvrralaš skuvlaseahka» lohkangilvvu goalmmát gearddi.
Unjárgga oahppogáldu 8. luohkálaččat ávvudedje gáhkuin maŋŋel go vuite «kultuvrralaš skuvlaseahka» lohkangilvvu man Deanu/Unjárgga girjebusse lágida Deanu ja Unjárgga skuvllaid 5. ja 8. luohká ohppiid várás.
– Mii dáhtuimet ávvudit ohppiid, danin galledeimme sin ja guossoheimmet gáhku ja skeŋkiimet stuorebuš vuoittuid, čállá girjebusse preassadieđáhusas.
Kamera ja jietnarusttet
Buot vuoitit ožžo jietnagirjjiid ja eará bivnnut nuoraidgirjjiid. Ohppiid gaska lei maid vuorbádeapmi ja guovttis oaččuiga stuorebuš vuoittuid. Johan Niillas Jernsletten vuittii jietnarusttegiid ja Stine Sofie Johnsen ges oaččui ođđa kamera.
Vuorbádeamis vuittii Johan Niillas Jernsletten jietnarusttegiid ja Stine Sofie Johnsen ges kamera. Govven: Synnøve Nilsen
Lohke áŋgirit
Unjárgga nuorat leat geavahan olu áiggi lohkat girjjiid go gilvu lágiduvvui, sii lohke sihke máinnas-, komediija-, action- ja historjjágirjjiid.
– Oahppit besse diibmobeali lohkat servodatfága ja dárogiel diimmuin, dasa lassin leat nuorat lohkat viššalit ruovttus, lohká oahpaheaddji Kjell-Harald Erichsen.
