Mannan čavčča leat iskan 613 ealgga Norrbottena leanas. Dál lea goalmmát ealggas gávdnon CWD-dávda Árjjátluovis Ruoŧa beal Sámis.
Ealggas mas lei guoirandávda, lei boaris ja iskosat čájehedje ahte vuoiŋŋamaččain lei dávda, muhto ii eará sajis. Danin sáhttá dat leat dávda mii ii njoamo, ja boahtá boaresvuođas, muhto dan eai vel dieđe. Dávda lea gávdnon dušše boares ealggain leanas.
– Mii eai sáhte dadjat sihkkarit ahte ii njoamo, dadjá Ruoŧa Stáda šibitdoavtterdoaimmahaga sekšuvdnahoavda (SVA) Erik Åren SVT Norrbottenii.
Dán jagi leat iskan visot ealggaid mat leat báhččon dan guovllus. Áigodagas 2018–2020 lea EU gáibidan ahte 6000 iskosa galget váldojuvvot visot gazzaelliin.
Dássážii leat iskan 1038 ealgga, 65 vuovderuoiggu, ja maid logi ruvdnaruoiggu Ruoŧas ja olu dain iskosiin bohtet Norrbottena leanas. Iskosat bohtet maid elliin mat leat gávdnon jápmán, báhččon dehe vuddjon.
