Stuoradiggeválggas lei Guovddášbellodat čielga vuoiti Guovdageainnus. 33,7 proseantta jienain leat ožžon dan suohkanis. – Duhtavaš, lohká Jan Ole Hermansen.
Stuoradiggeválggas lei Guovddášbellodat čielga vuoiti Guovdageainnus. 33,7 proseantta jienain leat ožžon dan suohkanis. – Duhtavaš, lohká Jan Ole Hermansen.
Stuoradiggeválggas leat 99,8 proseantta Guovdageainnu jienain lohkkon. Boađus čájeha ahte Guovddášbellodat lea váldán buori goalmmádasoasi jienain.
Maiddái sámediggeválggas váldá Guovddášbellodat 8,2 proseantta jienain Ávjováris. Dálá prognosaid mielde leat sis guokte áirasa Sámedikkis, Ávjováris ja Nuortaguovllu válgabiirres.
– Mii leat dahkan buori válgga, lohká Guovddášbellodaga Jan-Ole Hermansen.
– Olu ovdánan
Son lea goalmmátevttohas Ávjovári válgabiirres, muhto ii leat stuoradiggeválgii searvan.
– Lea somá oaidnit go min suohkana álbmot doarju min bellodaga, ja beassat leat stuorámus bellodat min suohkanis. Lea somá oaidnit bohtosa, leat mannan issoras olu ovddas maŋemuš válggaid rájes. Dat dieđusge váikkuha sámediggeválgii, mis ii leat leamaš olmmoš siste 2007 rájes, ja dál oažžut guokte, lohká Hermansen.
Bures dahkan Guovdageainnus
Son jáhkká Guovddášbellodaga ožžon nu buriid loguid Guovdageainnus go sis lea čielga boraspirepolitihkka.
– Mii leat bargan bures, ja leat čielgasat leamaš iežamet politihka ovddideamis. Skuvlapolitihkka, boazodoallopolitihkka ja mis lea čielga boraspirepolitihkka. Guovdageaidnu lea stuorámus boazodoallosuohkan Norggas, ja jáhkán olbmuid fuomášan ahte min politihkka heive buoremusat, lohká son.
Hermansen lea duhtavaš válggain, vaikko ieš ii beassan Sámediggái sisa.
Son lea goalmmátevttohas, ja dálá prognosaid mielde ii oaččo bellodat go ovtta áirasa Ávjováris, Hans Ole Eira.
– In beassan sámediggái muhto ii leat vahát. Dás ii leat olmmoš mii lea dehálaš, muhto min politihkka ja oažžut dan čađa, sihke Sámedikkis ja riikadásis.
Jan Ole Hermansen lea náitalan Ávvira váldodoaimmaheddjiin, Kari Lisbeth Hermanseniin. Váldodoaimmaheaddji ii leat leamašan mielde vuoruheamen dahje hábmemin ášši.
– Berit Marie Lise Eira, neahttaredaktevra.
