-Almmuhus-
-Almmuhus-
KULTUVRA  – Girjis leat áigeguovdilis fáttát ja olu humor

 – Girjis leat áigeguovdilis fáttát ja olu humor

-

-

Ingá Elin Marakatt lea čállán nuoraidromána guovtti nuppelotjahkásačča Sáve ja Nilssa birra. Muitalus lea mo Sáve eallin rievdá go eadnis vásiha bargguhisvuođa ja mo dálkkádatrievdan ja boraspiret váikkuhit áhčis boazodollui.  

Lágádus Davvi Girji almmuhii Johkamohkis, guovvamánu čihččet beaivvi, Ingá Elin Marakatt girjji: Sáve Sápmi. Girječálli Ingá Elin Marakatt lea Ađevuomis eret ja nuoraidromána muitalus vuolgá ge Ađevuomis Gárasavvona gielddas davimus Ruoŧas. Marakatt lea 30 jagi boaris ja girji lea su vuosttaš romána. 

NUORAIDROMÁNA: Olggoš Elin Marakatt girjjis : Sáve Sápmi, mii almmuhuvvui  07.02.20 Johkamohkis
NUORAIDROMÁNA: Olggoš Elin Marakatt girjjis : Sáve Sápmi, mii almmuhuvvui  07.02.20 Johkamohkis

Áigeguovdilis fáddá

Muitalus álgá go nieidda, Sáve, eadni, Ellen Marizza massá barggus gielddaviesus Gárasavvonis, ja makkár váttis dillái de šaddá olles bearaš. Iige leat buoret dilli duoddaris gos Sáve áhčči ges soahtá getkkiid ja lohkkašuvvan guohtumiid vuostá. Áhčči, Lásse Andreas, šaddá ruvkebargui dollet vai suitá fuođđariid oastit bohccuide. Eatni fas burgigoahtá gávppiid ruskalihtiid gos gávdná gávppiid hilgojuvvon borramušaid, stuorra heahpadin Sávii. Das maŋŋá darvána sosiála mediaide ja YouTubii ja bloggemii. 

– Dát lea duohtavuohta Sámis. Vaikko lea lossa fáddá, de lean čállán muitalusa somás vuogi mielde. Eadni lea hui somá, vaikko lea váttis ja lossat. Eadni šaddá measta dego «hippie» go fuomáša iežas vuogi mo birget, čilge Ingá Elin Marakatt. 

Lossa dillái gártet

– Háliidin čállit áigeguovdilis fáttáid birra nugo dálkkádatrievdan, boazodoalu dilli ja sosiála mediat. Go čálligohten, de šattai iešalddis dat muitalus.  Leat uhccán barggut davimus Ruoŧas. Go gielddat heaittihit kantuvrraideaset, ja olbmot masset bargguid, de fertejit olbmot ohcat bargosajiid stuorát báikkiin nu mo Gironis, lohká Ingá Elin Marakatt. 

Almmuhuvvui Johkamohkis

Ingá Elin Marakatt muitala earret Ájtte Musea girjegávppis, de lea son fitnan skuvllain ja lea vuovdán iežas girjji Sámi oahpahusguovddážis. Lohká girjjis leamaš buorre johtu.

– Lea nu somá go mánát illudit lohkat girjji sámegillii. Mun liikon čállit ja leamaš mu niehku čállit nuoraidgirjji. Mun háliidin dáinna girjjiin loktet suopmana ja čállit muitalusa nuoraid perspektiivvas, dadjá Ingá Elin Marakatt. 

Girjjis lea 172 siiddu. 

- Advertisement -
-Almmuhus-