Universitehtalektor čállá girjjistis ahte boaittobealde mánáidsuodjalusa bargiin leat fágalaš hástalusat vaikke makkár organiseren livččii.
Universitehtalektor čállá girjjistis ahte boaittobealde mánáidsuodjalusa bargiin leat fágalaš hástalusat vaikke makkár organiseren livččii.
UiT Norgga árktalaš universitehta mánáidsuodjalusa ja sosiála barggu instituhta vuosttašlektor Randi Marie Dahl Haugland lea čállán girjji mas čalmmustahttá smávva gielddaid mánáidsuodjalusa barggu.
– Smávva gielddain leat mánáidsuodjalusa bargiin máŋga rolla, sii galget sihke veahkehit, bearráigeahččat ja dahkat mearrádusaid. Dát lea hirbmat hástaleaddji, dadjá Haugland preassadieđáhusas.
Buohtastahttá
Girjjis divaštallá smávva gielddaid fágalaš hástalusaid ja hástalusaid mat čuožžilit organiserema geažil.
Son lea geahčadan guokte guorahallama mat guoskkahit smávva gielddaid mánáidsuodjalusa organiserema sihke ovdal ja maŋŋel go NAV ásahuvvui.
Mánásuodjalus sirrejuvvui eret gielddaid eará sosiála bálvalusain go NAV ásahuvvui.
– Buohtastahttin čájeha ahte smávva gielddaid mánáidsuodjalusain leat stuora hástalusat vaikke makkár organiseren livččii. Smávva báikkiin šaddet bargit ain leat ránnjá áššemeannudeaddjin ja sii šaddet gieđahallat váttisvuođaid ja rollariidduid stáhta dorvofierpmi haga, čilge girječálli.
Smávva báikkit bissot hástaleaddjin
Ođđa gielddareforbma lea vuot bohciidahttán divaštallama mánáidsuodjalusa bargguid ja stáhta ja gielddaid oktavuođa birra.
– Ráđđehus háliida ovddidit eanet ollislaš mánáidsuodjalusa go gielddat šaddet stuorábun, dasa lassin galggašedje mánáidsuodjalusas maiddái váldit badjelasaset stáhta bargguid. Mun in jáhke ahte dát čoavddašii mánáidsuodjalusa rolla- ja beroštusriidduid go mánáidsuodjalusa bargit han fertejit ain bargat smávva servodagain gos leat olu ehtalaš hástalusat, dadjá Haugland.
Girji lea vuosttažettiin studeanttaid várás, muhto girječálli jáhkká dás ávkki maiddái Bufetatii, gielddahálddahusaide ja earáide geat galget hábmet boahtteáiggi mánáidsuodjalusa.
