Guovdageainnu giellaguovddáža dovdomearkagilvvus leat válljen vuoiti
Guovdageainnu giellaguovddáža dovdomearkagilvvus leat válljen vuoiti
Guovdageainnu suohkan ásahii mannan čavčča ođđa giellaguovddáža man gohčodedje Giellagiisán. Dan oktavuođas almmuhedje dovdomearkagilvvu, mas dál leat válljen vuoiti.
Buorit evttohusat
Jurys ledje golmmas; Máret Ánne Sara guhte lea dáiddár, Aslak Mikal Mienna guhte bargá gulahallanbargin Beaivváš Sámi Našunála Teáhteris ja suohkana kultur- ja bajásšaddanovttadaga jođiheaddji Bodil Utsi Vars.
Gilvui bohte čieža evttohusa.
– Ledje hui buorit tevnnegat, muhto go árvvoštalaimet daid de geahčaimet nama ja makkár dovdomearka govvida buot eanemus giellaguovddáža, lohká Bodil Utsi Vars.
– Bures govve doaimma
Ja dat mii buoremusat heivii jury eavttuide, lei ge 19-jahkásaš mázelačča Stine Marje Vars tevnnet. Das lea jorbá man siste lea giisá, ja de lea Giellagiisá čállon báldii ođđaáigásaš seakka bustávaiguin.
– Su tevnnet attii buriid assosiašuvnnaid ja govve Giellagiissá doaimma, čilge Bodil Utsi Vars.
Giitá buohkaid
Jurylahttu lohká leamaš váttisin válljet vuoiti go ledje nu olu buorit evttohusat.
– Mii sávvat lihkku vuoitái ja giitit buohkaid geat oassálaste gilvvus, lohká Bodil Utsi Vars.