Gieldda- ja distrivttaministtar Bjørn Arild Gram lea boahtán su vuosttaš virggálaš mátkkis galledit Sámedikki oktan sámi áššiid stáhtačálliin Nancy Porsanger Antiin.
Gieldda- ja distrivttaministtar Bjørn Arild Gram muitala dát lea su vuosttaš virggálaš mátki ja lei erenoamáš suohtas go dat šattai Sámedikki ovccát rahpamii. Son lohká leamaš su bargoveagain Kárášjogas gaskavahkku rájes, oahpásmuvvamin Sámedikkiin. Son muitala gullan Majestehtalaš Gonagas Haralda sártnis Sámediggái olu áššiid birra maid fertešii njulget. Gieldda- ja distrivttaministtar Bjørn Arild Gram muitala su departemeanta lea okta dain stuorámus departemeanttain ja leat olu áššit mat vurdet su meannudeami.
Maiddái stáhtačálli Nancy Porsanger Anti mielas lei somá go vuosttaš virggálaš mátki manai davás, su ruovttuguvlui. Soai muitaleaba ahte dán departemeanttas galget leat njeallje stáhtačálli. Dál leaba Kjersti Bjørnstad ja Ole Gustav Narud nammaduvvon ja váilu velá okta stáhtačálli.
